पुणे : सोशल मीडियावर सध्या एक मेसेज वेगाने व्हायरल होत आहे, ज्यामध्ये असा दावा केला जात आहे की, येत्या 1 नोव्हेंबर 2026 पासून महाराष्ट्रातील सर्व पिवळ्या आणि केशरी रेशनकार्डधारकांना मोफत धान्य मिळणे बंद होणार आहे.या मेसेजमुळे अनेक शिधापत्रिकाधारकांमध्ये संभ्रमाचे वातावरण निर्माण झाले आहे. परंतु, हा दावा पूर्णपणे दिशाभूल करणारा असून राज्य सरकारने सर्व रेशनकार्डधारकांचे धान्य बंद करण्याचा कोणताही निर्णय घेतलेला नाही.
केंद्र सरकारच्या ‘मिशन सुधार’ उपक्रमांतर्गत सध्या महाराष्ट्रभरात रेशनकार्डांची पडताळणी मोहीम सुरू आहे. या मोहिमेचा मुख्य उद्देश सरकारी योजनांचा लाभ योग्य आणि खऱ्या गरजूंपर्यंत पोहोचवणे हा आहे.
या प्रक्रियेत खालील प्रकारच्या शिधापत्रिकांची तपासणी केली जात आहे:
मृत व्यक्तींच्या नावावर असलेले रेशनकार्ड,बनावट किंवा दुबार (duplicate) नोंदी, कायमचे स्थलांतरित झालेले नागरिक,गेल्या अनेक महिन्यांपासून वापरात नसलेली रेशनकार्ड, फक्त अपात्र कार्डधारकांवर कारवाई या सर्वांची तपासणी केली जात आहे
या पडताळणीदरम्यान नियमांत न बसणाऱ्या आणि अपात्र ठरलेल्या सुमारे 2.85 लाख लाभार्थ्यांची नावे यादीतून वगळण्यात आली आहेत. यामुळे केवळ अपात्र ठरलेल्यांचाच अन्नधान्याचा पुरवठा थांबणार आहे. सर्वसामान्य, पात्र आणि गरजू पिवळ्या तसेच केशरी रेशनकार्डधारकांना आधीप्रमाणेच नियमानुसार मोफत धान्य मिळत राहील.
त्यामुळे नागरिकांनी सोशल मीडियावरील कोणत्याही अफवांना किंवा चुकीच्या मेसेजला बळी पडू नये. रेशनकार्डाशी संबंधित कोणतीही शंका असल्यास आपल्या जवळच्या शिधावाटप दुकानात (रेशन दुकान) किंवा तहसील कार्यालयात जाऊन थेट चौकशी करावी आणि अधिकृत माहितीवरच विश्वास ठेवावा
