पुणे : पुण्यातील चिंचवड भागात कौटुंबिक वादातून एका तरुणाला त्याच्या सासरच्या मंडळींनी बेदम मारहाण केल्याची धक्कादायक घटना घडली आहे. मुले मातीत खेळत आहेत हे सांगायला गेलेल्या जावयाला सासरच्या लोकांनी शिवीगाळ करत सिमेंटच्या पेव्हर ब्लॉकने डोक्यात आणि पाठीवर मारून गंभीर जखमी केले. निगडी पोलीस ठाण्यात याप्रकरणी चार जणांविरोधात गुन्हा नोंदवण्यात आला आहे.
मिळालेल्या माहितीनुसार, चिंचवड येथील अजंथानगर परिसरात नेहाल रमेश गायकवाड (वय 31) हे आपल्या कुटुंबासह राहतात. त्यांच्या घराच्या शेजारीच त्यांचे सासर आहे. घटनेच्या दिवशी त्यांची पत्नी माहेरी गेलेली होती. दरम्यान, आपली मुले बाहेर मातीत खेळत असल्याचे नेहाल यांच्या निदर्शनास आले. हेच सांगण्यासाठी ते पत्नीच्या माहेरी गेले होते. मात्र, तिथे पोहोचताच सासरच्या लोकांनी त्यांच्याशी वाद घालण्यास सुरुवात केली.
आरडाओरडा आणि दमदाटी करत सासरच्या मंडळींनी नेहाल यांना मारहाण करण्यास सुरवात केली. याच रागातून समाधान सुनील लांडगे (वय 20) या तरुणाने थेट सिमेंटचा पेव्हर ब्लॉक उचलून नेहाल यांच्या डोक्यात, हातावर आणि पाठीवर मारला. ही घटना 17 ऑक्टोबर रोजी घडली होती. यानंतरही सासरच्या मंडळींचा राग शांत झाला नव्हता.
27 ऑक्टोबर रोजी नेहाल कामावर जाण्यासाठी घरातून बाहेर पडले असता, सासरच्या लोकांनी त्यांना रस्त्यात गाठून पुन्हा मारहाण केली. वारंवार होणाऱ्या या त्रासाला आणि हल्ल्याला कंटाळून अखेर नेहाल यांनी पोलिसांत धाव घेतली.
या घटनेनंतर पीडित पतीने निगडी पोलीस ठाण्यात तक्रार दाखल केली. पोलिसांनी प्राप्त तक्रारीवरून समाधान लांडगे याच्यासह तीन महिलांविरोधात मारहाण आणि दमदाटीचा गुन्हा दाखल केला असून, या प्रकरणी पोलीस अधिक तपास करत आहेत.
