लोणी काळभोर : मद्याच्या नशेत बेडवर लघुशंका केल्यानंतर बिछाना साफ करण्यासाठी झोपेतून उठविल्याचा राग मनात धरून एकाने पत्नीला बेदम मारहाण केल्याची घटना घडली आहे. ही घटना लोणी काळभोर ग्रामपंचायत हद्दीत मंगळवारी (ता.11) रात्री दहा वाजण्याच्या सुमारास घडली आहे.
याप्रकरणी 26 वर्षीय महिलेने लोणी काळभोर पोलीस ठाण्यात फिर्याद दिली आहे. त्यानुसार फिर्यादी महिलेच्या 33 वर्षीय पतीच्या विरोधात मारहाणीचा गुन्हा दाखल करण्यात आला आहे.
पोलिसांनी दिलेल्या माहितीनुसार, फिर्यादी सीमा (बदललेले नाव) व आरोपी रोहित (बदललेले नाव) हे दोघे नात्याने पती – पत्नी आहेत. रोहित यांचा लोणी काळभोर परिसरात व्यवसाय आहे. त्यांच्या व्यवसायातून होणाऱ्या आर्थिक उलाढालीतून कुटुंबाचा उदरनिर्वाह चालवितो. तर फिर्यादी सीमा या एक गृहिणी आहेत. रोहित यांना दारूचे व्यसन आहे. रोहित हा नेहमीप्रमाणे मंगळवारी दारू पिऊन आला व घरातील बेडवर झोपला होता. त्याने दारूच्या नशेत झोपल्यानंतर बेडवरच लघुशंका केली. बेड का घाण केले म्हणून सीमा रोहितला जाब विचारत होत्या. त्यानंतर बिछाना साफ करण्यासाठी सीमाने रोहितला उठविले व बाजूला बसण्यास सांगितले.
दरम्यान, सीमा या बिछाना साफ करीत असताना, आपल्याला झोपेतून उठविल्याचा व लघुशंका केल्याचा जाब विचारायचा राग मनात धरून आरोपी रोहितने लाकडी काठीने सीमाला मारहाण केली. या मारहाणीत सीमाच्या डोक्याला जबर मार लागून मोठ्या प्रमाणात रक्तस्राव झाला आहे.त्यानंतर सीमाला दमदाटी करून रोहित घरातून निघून गेला.
याप्रकरणी सीमाने लोणी काळभोर पोलीस ठाण्यात फिर्याद दिली आहे. त्यानुसार आरोपी रोहितच्या विरोधात गुन्हा दाखल करण्यात आला आहे. पुढील तपास लोणी काळभोर पोलीस ठाण्याचे वरिष्ठ पोलिस निरीक्षक राजेंद्र पन्हाळे यांच्या मार्गदर्शनाखाली पोलिस हवालदार राणी खामकर व केतन धेंडे करीत आहेत.
