लोणी काळभोर : पुणे-सोलापूर महामार्गावरील लोणी फाटा पुलावर रस्त्यातच रिक्षा उभी करून प्रवासी भरणाऱ्या रिक्षाचालकाने वाहतुकीस अडथळा निर्माण केल्याचा प्रकार समोर आला आहे. वाहतूक पोलिसांनी रिक्षा बाजूला घेण्यास सांगून कारवाईसाठी पोलीस ठाण्यात चलण्यास सांगितले असता, कारवाई टाळण्यासाठी संबंधित रिक्षाचालकाने स्वतःच डोक्यात दगड मारून घेतल्याची घटना शनिवारी (ता. 14 ) सायंकाळी घडली आहे. त्यानंतर तो रिक्षासह घटनास्थळावरून पसार झाला.
याप्रकरणी लोणी काळभोर वाहतूक विभागाचे पोलीस कर्मचारी योगेश रामभाऊ काकडे यांनी लोणी काळभोर पोलीस ठाण्यात फिर्याद दिली आहे. त्यानुसार रिक्षाचालक शंकर मनोहर खंडागळे (वय 50 , रा. कदमवाकवस्ती) याच्याविरोधात भारतीय न्याय संहिता कलम 285 तसेच मोटार वाहन कायदा कलम 119 , 177 अन्वये गुन्हा दाखल करण्यात आला आहे.
पोलिसांनी दिलेल्या माहितीनुसार, लोणी बाजार फाटा परिसरात वाहतूक कोंडी झाल्याने पोलीस कर्मचारी काकडे यांना वाहतूक सुरळीत करण्यासाठी पाठविण्यात आले होते. रात्री सव्वाआठच्या सुमारास पुणे-सोलापूर महामार्गावरील पुलावर एमएच 12 एक्सएन 5397 क्रमांकाची रिक्षा उभी करून चालक प्रवासी भरत असल्याचे त्यांच्या निदर्शनास आले. त्यामुळे पुलावर वाहनांच्या रांगा लागून वाहतुकीचा खोळंबा होत होता.
काकडे यांनी रिक्षाचालकाला रिक्षा बाजूला घेण्यास सांगितले. तसेच पुढील कारवाईसाठी पोलीस ठाण्यात चलण्यास सांगितले. मात्र, संबंधित चालकाने स्वतःच्या डोक्यात दगड मारून घेतला आणि तेथून निघून जाण्याचा प्रयत्न केला. त्यानंतर रिक्षा सुरू करून तो घटनास्थळावरून पसार झाला. या प्रकारामुळे महामार्गावरील वाहतुकीला अडथळा निर्माण झाल्याने पोलिसांनी संबंधित रिक्षाचालकाविरोधात कायदेशीर कारवाई सुरू केली आहे.
