Lok Sabha Election 2024 : महाराष्ट्रातील (Maharashtra) आठही मतदारसंघांमध्ये मतदानास सुरुवात झालीय. आठ मतदारसंघांत अटीतटीची लढाई सुरु आहे. सकाळपासून उत्साहात मतदान सुरू असले तरी गोंदिया आणि नागपूरमध्ये काही मतदान केंद्रांवर ईव्हीएम मशीन बंद पडल्याच्या घटना घडल्या आहेत. यामुळे मतदान सुरू होण्यास उशीर झाला. तर हिंगोलीत 39 मतदान केंद्रावर मतदानासाठी अडथळा आलायं.
पहिल्या दोन तासात हिंगोलीमध्ये 39 मतदान केंद्रावर मतदानासाठी अडथळा आलं आहे. मशीन बिघडल्यामुळे मतदारांना ताटकळत उभे राहावे लागल्यामुळे मतदानाचा टक्का थोडासा घसरला आहे. हिंगोलीत 7.23 टक्के मतदान झाले. हिंगोलीत 39 बॅलेट मशीन आणि 16 कंट्रोल युनिट बदलले. 25 ठिकाणी व्हीव्हीपॅटच्या मशीन बदलाव्या लागल्या. एकूण 39 हून अधिक मतदान केंद्रावर पहिल्या दोन तासांमध्ये मतदानाला अडथळा आला आहे. मतदानाला अडथळा आल्याची माहिती निवडणूक निर्णय अधिकाऱ्यांनी दिली आहे.
महाराष्ट्रात आज सकाळपासून 9 वाजेपर्यंत एकूण 7.45 टक्के मतदान झाल्याची माहिती समोर आली आहे. अमरावतीच्या वडरपुरा भागातील महापालिका शाळेतील मतदान केंद्रात ईव्हीएममध्ये बिघाड झाला आहे. या केंद्रात तीन खोल्या आहेत. त्यापैकी खोली क्रमांत १ मधील ईव्हीएममध्ये बिघाड झालं. परिणामी इथलं मतदान थांबलं होते.
यावेळी मतदानाच्या वेळी नांदेडच्या मतदान केंद्र 5 वरील ईव्हीएम मशीन बंद झालं. गेल्या तासाभरापासून मतदान केंद्र बंद असल्याने मतदारांचा खोळंबा झाला होता. तर वर्ध्यातील कारंजामधील मतदान केंद्रातही EVM मशीनमध्ये बिघाड झाला होता.
