Leopard : सध्या संपूर्ण महाराष्ट्रात बिबट्याने चांगलाच धुमाकूळ घातला आहे. गावांमधून शहरांकडे बिबट्यांचा वावर वाढल्याने नागरिकांमध्ये प्रचंड दहशत पसरली आहे. गेल्या काही दिवसांपूर्वी डोंबिवली आणि अंबरनाथमध्ये बिबट्याचे दर्शन झाले होते. आता मुंबईपासून काही तासांच्या अंतरावर असलेल्या बदलापूर शहराच्या आसपासही बिबट्याने आपली दहशत निर्माण करायला सुरुवात केली आहे. (leopard)
दोन बिबट्यांची दहशत
बदलापूरजवळ असलेल्या आंबेशिव गावाच्या हद्दीत बिबट्याची प्रचंड दहशत पसरली आहे. सर्वात धक्कादायक बाब म्हणजे, इथे एक नाही, तर दोन बिबटे असल्याचा दावा स्थानिकांनी केला आहे. गावातील नागरिकांच्या म्हणण्यानुसार, आज, शुक्रवारी (१२ डिसेंबर) दुपारी दोनच्या सुमारास एका बिबट्याने भरदुपारी एका कुत्र्याची शिकार केली. रस्त्यावर रक्ताचा सडा पडलेला दिसल्याने हा प्रकार उघडकीस आला. यापूर्वी बिबट्याने एका वस्तीजवळ कोंबड्यांवर हल्ला केल्याचे सीसीटीव्ही फुटेजही व्हायरल झाले होते.
गावकऱ्यांमध्ये भीतीचे वातावरण
गेल्या चार ते पाच दिवसांपासून आंबेशिव गावात स्थानिकांना वारंवार बिबट्याचे दर्शन होत आहे. यामुळे इथले ग्रामस्थ प्रचंड दहशतीखाली जगत आहेत. विशेषतः लहान मुले आणि महिलांना घराबाहेर पडताना भीती वाटत आहे.
वन विभागाचे प्रयत्न
गावकऱ्यांनी बिबट्या असल्याचा दावा केल्यानंतर लगेच वन विभागाला याची माहिती देण्यात आली. वन विभागाने तातडीने या भागात कोम्बिंग ऑपरेशन (शोधमोहीम) सुरू केले आणि आवश्यक उपाययोजनाही केल्या. मात्र, अद्याप बिबट्याला पकडण्यात वन विभागाला यश आलेले नाही. त्यामुळे आंबेशिव आणि आसपासच्या गावांमध्ये भीतीचे वातावरण कायम आहे.
