दिल्ली : घरात कोट्यवधींच घबाड सापडल्याने चर्चेत आलेले दिल्ली उच्च न्यायालयाचे तत्कालीन न्यायमूर्ती यशवंत वर्मा यांच्या बंगल्यात सापडलेल्या अर्ध्या जळालेल्या नोटा प्रकरणात नवीन खुलासे झाले आहेत., आगीनंतर ज्या स्टोअर रूममध्ये जळालेली रोकड सापडली ती जागा न्यायमूर्ती वर्मा आणि त्यांच्या कुटुंबाच्या ताब्यात होती, अशी माहिती समोर आली आहे.
याबाबत मिळालेल्या माहितीनुसार, इलेक्ट्रॉनिक पुरावे, साक्षीदार आणि बंगल्याच्या तपासाच्या आधारे तपास समितीने हा निष्कर्ष काढला आहे की, आगीनंतर ज्या स्टोअर रूममध्ये जळालेली रोकड सापडली ती जागा न्यायमूर्ती वर्मा आणि त्यांच्या कुटुंबाच्या ताब्यात होती. समितीने 50 हून अधिक लोकांचे जबाब नोंदवले. यामध्ये दिल्ली पोलिस आयुक्त संजय अरोरा आणि अग्निशमन सेवेचे प्रमुख यांचा समावेश होता. आगीनंतर घटनास्थळी पोहोचलेल्यांमध्ये हे दोन्ही अधिकारी सर्वात आधी पोहोचले होते. 14 मार्च 2025 रोजी रात्री 11 वाजून 35 मिनिटांनी आग लागल्यानंतर स्टोअर रूममधून रोख रक्कमही काढून टाकण्यात आल्याचे अहवालात म्हटले आहे.
दरम्यान न्यायमूर्तींच्या बंगल्यात अर्ध्या जळालेल्या नोटा सापडल्याची माहिती समोर आल्यानंतर, तत्कालीन सीजेआय संजीव खन्ना यांनी 22 मार्च रोजी या प्रकरणाची चौकशी करण्यासाठी एक पॅनेल स्थापन केली होती. 4 मे रोजी या समितीने आपला अहवाल सरन्यायाधीशांना सादर केला. यात न्यायमूर्ती वर्मा यांना दोषी ठरवण्यात आले. अहवालाच्या आधारे, सरन्यायाधीशांनी ‘इन-हाऊस प्रोसिजर’ अंतर्गत न्यायमूर्ती वर्मा यांच्याविरुद्ध महाभियोगाची शिफारस केली होती. चौकशी समितीमध्ये पंजाब आणि हरियाणा उच्च न्यायालयाचे मुख्य न्यायाधीश शील नागू, हिमाचल उच्च न्यायालयाचे मुख्य न्यायाधीश जीएस संधावालिया आणि कर्नाटक उच्च न्यायालयाचे न्यायाधीश न्यायमूर्ती अनु शिवरामन यांचा समावेश होता.
