पुणे : राष्ट्रवादी काँग्रेस पक्षामध्ये अध्यक्षपदावरून सुरू असलेला कायदेशीर वाद आता अधिक तीव्र झाला आहे. पक्षाचे माजी राष्ट्रीय सचिव सच्चिदानंद सिंह यांनी राष्ट्रीय अध्यक्षा आणि उपमुख्यमंत्री सुनेत्रा पवार आणि वरिष्ठ नेते प्रफुल्ल पटेल यांना पुन्हा एकदा रिमायंडर नोटीस पाठवली आहे.
उपमुख्यमंत्री सुनेत्रा पवार यांना हे पत्र 17 ऑगस्ट रोजी जारी करण्यात आले आहे. यापूर्वी 9 जुलै 2026 रोजी सच्चिदानंद सिंह यांनी पहिली नोटीस बजावली होती. त्या नोटीसमध्ये त्यांनी 26 फेब्रुवारी 2026 रोजी पार पडलेल्या पक्षाच्या बैठकीत सुनेत्रा पवार यांची राष्ट्रीय अध्यक्षपदी झालेली निवड बेकायदेशीर असल्याचा दावा केला होता. पक्षाच्या संविधानातील नियमांचे पालन न करता ही निवड करण्यात आल्याचा आरोप त्यांनी केला होता.
पहिल्या नोटीसनंतर पक्षाकडून योग्य उत्तर किंवा कारवाई न झाल्याने, सिंह यांनी 17 ऑगस्ट रोजी हे नवीन स्मरणपत्र पाठवून आपल्या आक्षेपांचा पुनरुच्चार केला आहे. यापूर्वी पाठवलेल्या नोटीसीला अनुसरूनच हे रिमायंडर जारी करण्यात आले आहे.सुनेत्रा पवार यांच्या निवडीबाबत निर्माण झालेल्या या कायदेशीर पेचप्रसंगामुळे राष्ट्रवादी काँग्रेस पक्षाच्या अंतर्गत गोटात मोठी खळबळ उडाली आहे.
आता या विषयावर पक्षाचे नेतृत्व काय भूमिका घेते आणि या नोटीसला कायदेशीर मार्गाने कसे उत्तर देते, याकडे सर्वांचे लक्ष लागले आहे.
