मुंबई: अभिनेता गोविंदा आणि पत्नी सुनीता आहुजा यांच्या नात्याबाबत गेल्या काही दिवसांपासून चर्चांना उधाण आलं आहे. सुनीताने गोविंदा आणि अभिनेत्री कोमल राणी स्वर्णकार यांच्या कथित नात्यावर भाष्य करत त्याच्यावर ‘शुगर डॅडी’ असा आरोप केल्याची चर्चा आहे. या पार्श्वभूमीवर सुनीता फॅमिली कोर्टात गेल्याच्या बातम्याही समोर आल्या होत्या.
दरम्यान, गोविंदाचं अनेक वर्षांपूर्वीचं एक वक्तव्य आता पुन्हा चर्चेत आलं आहे. एका जुन्या मुलाखतीत गोविंदाने कुंडलीत दुसरं लग्न असून भविष्यात दुसरं लग्न होण्याची शक्यता असल्याचं म्हटलं होतं. या वक्तव्याचा संदर्भ सध्या सुरू असलेल्या चर्चांशी जोडला जात आहे. मात्र, हे वक्तव्य जुने असून सध्याच्या परिस्थितीबाबत त्यातून कोणताही निष्कर्ष काढता येत नाही.
गोविंदाचं नाव यापूर्वीही बॉलिवूडमधील काही अभिनेत्रींसोबत जोडलं गेलं होतं. एका जुन्या मुलाखतीत त्याने अभिनेत्री जुही चावला आणि दिव्या भारती यांच्याबद्दल आपल्याला आकर्षण असल्याचं सांगितलं होतं. त्यावेळी त्याने पत्नी सुनीता या वक्तव्यामुळे नाराज होऊ शकते, याची जाणीव असल्याचंही म्हटलं होतं. आपल्या कुंडलीत दुसऱ्या लग्नाचा योग असल्याचा उल्लेखही त्याने केल्याचं जुन्या वृत्तांमध्ये नमूद करण्यात आलं आहे. त्यामुळे त्याचं हे जुनं वक्तव्य सध्या सोशल मीडियावर पुन्हा चर्चेचा विषय ठरत आहे.
दरम्यान, गोविंदा आणि सुनीता यांच्या वैवाहिक नात्याबाबत अधिकृतपणे नेमकी काय परिस्थिती आहे, याबाबत मात्र दोघांकडून स्पष्ट माहिती समोर आलेली नाही.
