पुणे : राष्ट्रवादी काँग्रेस (शरद पवार गट) पक्षाचे ज्येष्ठ नेते एकनाथ खडसे लवकरच भाजपमध्ये परतणार असल्याच्या चर्चांना पुन्हा एकदा उधाण आले आहे. नुकतीच एकनाथ खडसे आणि भाजपचे राष्ट्रीय सरचिटणीस विनोद तावडे यांच्यात मुंबईत एक महत्त्वाची भेट झाली. मुंबईतील निवासस्थानी झालेल्या या भेटीत दोन्ही नेत्यांमध्ये बराच वेळ संवाद झाला. या भेटीचे फोटो सोशल मीडियावर व्हायरल झाल्यानंतर महाराष्ट्राच्या राजकीय वर्तुळात अनेक तर्क-वितर्क लढवले जात आहेत.
या भेटीमुळे विशेषतः उत्तर महाराष्ट्राच्या राजकारणात मोठे फेरबदल होण्याची शक्यता वर्तवली जात आहे. राजकीय जाणकारांच्या मते, उत्तर महाराष्ट्रात भाजपचे संकटमोचक मानले जाणारे नेते गिरीश महाजन यांचा वाढता प्रभाव कमी करण्यासाठी भाजपच्या केंद्रीय नेतृत्वाने ही खेळी खेळली असण्याची शक्यता आहे. खडसे यांच्या पुनरागमनामुळे महाजन यांच्या वर्चस्वाला शह दिला जाऊ शकतो, अशी चर्चा सध्या रंगली आहे. त्यामुळे या एका भेटीने राज्याच्या राजकारणात नव्या भूकंपाचे संकेत दिले आहेत.
दरम्यान, एकनाथ खडसे यांनी स्वतः या भेटीला दुजोरा दिला आहे. मात्र, त्यांनी यातील राजकीय चर्चांचे खंडन केले. प्रसारमाध्यमांशी बोलताना खडसे म्हणाले की, विनोद तावडे हे खरं तर खासदार रक्षा खडसे यांना भेटण्यासाठी आले होते. त्यादरम्यान त्यांनी माझीही भेट घेऊन माझ्या प्रकृतीची विचारपूस केली. या भेटीमागे कोणताही राजकीय हेतू नसून ही केवळ एक कौटुंबिक आणि वैयक्तिक भेट होती, असा दावा खडसे यांनी केला आहे.
दरम्यान विधानसभा निवडणुकीच्या पार्श्वभूमीवर झालेल्या या भेटीला राजकीयदृष्ट्या अत्यंत महत्त्व दिले जात आहे. एकनाथ खडसे आगामी काळात कोणता मोठा निर्णय घेतात आणि त्यांची भाजपमधील ‘घरवापसी’ कधी होते, याकडे आता सर्वांचे लक्ष लागले आहे.
