पुणे : राजधानी दिल्लीतील जंतर-मंतर येथे प्रश्नपत्रिका फुटीविरोधात आंदोलन करणाऱ्या ‘जेन झी’ (Gen Z) तरुणांविषयी वादग्रस्त वक्तव्य केल्यामुळे भाजप खासदार आणि अभिनेत्री कंगना राणौत पुन्हा एकदा कायदेशीर अडचणीत सापडल्या आहेत. या आंदोलक विद्यार्थ्यांना आणि त्यांच्या पालकांना कथितपणे ‘गटर जनरेशन’ संबोधल्यामुळे त्यांच्याविरोधात उत्तर प्रदेशातील आग्रा येथील खासदार/आमदार न्यायालयात याचिका दाखल करण्यात आली असून कोर्टाने ती स्वीकारली आहे.
याप्रकरणी आग्रा येथील विशेष न्यायालयात 21 ऑगस्ट रोजी पहिली सुनावणी होणार आहे. याचिकाकर्ते आणि वकील रमाशंकर शर्मा यांनी कंगना यांच्यावर तीव्र शब्दांत टीका केली आहे. कंगना यांनी आंदोलक तरुणांचा आणि त्यांच्या पालकांचा जाहीर अपमान केला असून, विद्यार्थ्यांच्या भविष्यावरही प्रश्नचिन्ह उपस्थित केले आहे, असा आरोप शर्मा यांनी केला आहे.
जर आग्रा न्यायालयाने ही याचिका फेटाळली, तर या प्रकरणी सत्र न्यायालय आणि गरज पडल्यास सर्वोच्च न्यायालयात दाद मागू, असा इशाराही त्यांनी दिला आहे.जून आणि जुलै महिन्यात कॉक्रोच जनता पार्टीने पेपर लीकप्रकरणी भव्य आंदोलन पुकारले होते. या आंदोलनात मोठ्या संख्येने विद्यार्थी सहभागी झाले होते आणि त्याचे व्हिडिओ सोशल मीडियावर तुफान व्हायरल झाले होते. या आंदोलनावर भाष्य करताना कंगना यांनी केलेले वक्तव्य त्यांच्या अंगलट आले आहे.
आपल्या वक्तव्यांमुळे सतत चर्चेत राहणाऱ्या कंगना राणौत यांच्यावर यापूर्वीही अनेक वादांचे सावट राहिले आहे. देशातील तरुण पिढीचा आणि विद्यार्थ्यांचा अपमान केल्याचा ठपका ठेवत आता त्यांच्या अडचणी वाढल्या आहेत. त्यामुळे आगामी 21 ऑगस्टच्या सुनावणीत न्यायालय काय निर्णय घेते आणि कंगना राणौत यांना या प्रकरणात दिलासा मिळतो की ‘जेन झी’च्या विरोधानंतर माघार घ्यावी लागते, याकडे सर्वांचे लक्ष लागले आहे.
