भिगवण : शेतीच्या मालकी हक्कावरून सुरू असलेल्या वादाचे पर्यवसान हिंसक हल्ल्यात झाल्याची धक्कादायक घटना मदनवाडी (ता. इंदापूर) येथे घडली. जिमला जाण्यासाठी इलेक्ट्रिक स्कुटीवरून निघालेल्या 18 वर्षीय आयटीआयच्या विद्यार्थ्यावर कुऱ्हाड, कोयता, तलवार आणि लोखंडी रॉडने हल्ला केल्याचा प्रकार समोर आला आहे. या हल्ल्यात तरुणाचे समोरील दोन दात पडले असून, डाव्या हाताचे हाड फ्रॅक्चर झाले आहे. डोक्यासह शरीराच्या विविध भागांवरही त्याला गंभीर दुखापती झाल्या आहेत.
लोक महेश देवकाते (वय 18, रा. देवकातेवस्ती, मदनवाडी, ता. इंदापूर) असे जखमी तरुणाचे नाव आहे. तर साहील संताजी देवकाते, संताजी धनंजय देवकाते, संभाजी धनंजय देवकाते, चैतन्य सुतार, स्वप्नील हनुमंत देवकाते, तुषार हनुमंत देवकाते आणि सवाणे (पूर्ण नाव माहीत नाही) यांच्याविरुद्ध गुन्हा दाखल करम्यात आला आहे.
पोलिसांनी दिलेल्या माहितीनुसार, लोक देवकाते यांचे वडील महेश आणि चुलते संताजी देवकाते यांच्यात शेतीच्या मालकी हक्कावरून वाद सुरू असून, हा वाद इंदापूर येथील दिवाणी न्यायालयात प्रलंबित आहे. याच कारणावरून कुटुंबांमध्ये वारंवार वाद होत असल्याचे त्याने म्हटले आहे.13 ऑक्टोबर रोजी पहाटे सव्वापाचच्या सुमारास लोक देवकाते हा घरातून इलेक्ट्रिक स्कुटीवरून भिगवण येथील डायमंड जिममध्ये जाण्यासाठी निघाला होता.
पहाटे साडेपाचच्या सुमारास बारामती-भिगवण रस्त्यावरील दगडी पुलाजवळ, देवकाते डी.पी. परिसरातील वळणावर त्याच्या मागून पल्सर मोटारसायकल आली. त्यावरील साहील देवकाते याने कुऱ्हाडीने लोक याच्या डोक्याच्या मागील बाजूस मारले. त्यानंतर संताजी देवकाते यांनी कोयत्याने त्याच्या डाव्या पायावर वार केल्याने तो खाली पडला. त्याचवेळी आणखी तीन मोटारसायकलींवरून काही जण घटनास्थळी आले आणि त्यांनी रस्ता अडवला.
लोखंडी रॉडने मारहाण; तलवारीचा वार चुकवला
फिर्यादीनुसार, संभाजी देवकाते याने लोखंडी रॉडने खांद्यावर व पाठीवर मारहाण केली, तर चैतन्य सुतार याने डाव्या हातावर रॉडने वार केल्याने हाताचे हाड फ्रॅक्चर झाले. स्वप्नील देवकाते यानेही लोखंडी रॉडने मारहाण केल्याचा आरोप आहे. तुषार देवकाते याने तलवार उगारून वार करण्याचा प्रयत्न केला; मात्र आपण बाजूला सरकल्याने तलवारीचा वार चुकविल्याचे तरुणाने जबाबात म्हटले आहे. सवाणे नावाच्या व्यक्तीनेही लोखंडी रॉडने मारहाण केल्याचा आरोप करण्यात आला आहे.
दरम्यान, या हल्ल्यात लोक याचे समोरील दोन दात पडले असून, त्याला अनेक दुखापती झाल्या. घटनेनंतर त्याच्यावर रुग्णालयात उपचार सुरू असल्याचे जबाबात नमूद आहे. या प्रकरणी साहील संताजी देवकाते, संताजी धनंजय देवकाते, संभाजी धनंजय देवकाते, चैतन्य सुतार, स्वप्नील हनुमंत देवकाते, तुषार हनुमंत देवकाते आणि सवाणे (पूर्ण नाव माहीत नाही) यांच्याविरुद्ध गुन्हा दाखल करण्यात आला आहे.
