पुणे : पुणे ग्रामीण परिसरातील जुन्या वाहनांचे व्यवहार करणाऱ्या सर्व व्यावसायिकांना आता खरेदी-विक्री केलेल्या गाड्यांची संपूर्ण माहिती संबंधित स्थानिक पोलीस ठाण्यात जमा करणे अनिवार्य करण्यात आले आहे. यासंदर्भात अपर जिल्हादंडाधिकारी ज्योती कदम यांनी अधिकृत आदेश प्रसिद्ध केले आहेत.प्रशासनाने सुरक्षेच्या दृष्टीने हा मोठा निर्णय घेतला आहे.
भारतीय नागरीक सुरक्षा संहिता, 2023 च्या कलम 163 अंतर्गत मिळालेल्या अधिकारांचा वापर करून अपर जिल्हादंडाधिकाऱ्यांनी हे निर्देश जारी केले आहेत. या नियमामुळे गुन्हेगारी कारवायांवर आणि चोरीच्या गाड्यांच्या विक्रीवर मोठ्या प्रमाणात आळा बसेल, असा विश्वास व्यक्त केला जात आहे.
ज्या गाड्यांच्या खरेदी-विक्रीचा व्यवसाय करणाऱ्या डीलर्स किंवा व्यापाऱ्यांनी ही माहिती पोलिसांना दिली नाही, त्यांच्यावर कायदेशीर बडगा उगारला जाणार आहे. नियमांचे उल्लंघन करणाऱ्या व्यावसायिकांवर भारतीय न्याय संहितेच्या कलम 223 नुसार दंडात्मक आणि कायदेशीर कारवाई केली जाईल.
या आदेशाची जिल्ह्यात कडक अंमलबजावणी करण्याचे स्पष्ट निर्देश स्थानिक पोलीस प्रशासनाला देण्यात आले आहेत. त्यामुळे पुणे ग्रामीण भागातील सर्व जुन्या गाड्यांच्या व्यापाऱ्यांनी तात्काळ आपल्या व्यवहारांची नोंद जवळच्या पोलीस स्टेशनला देऊन संभाव्य कायदेशीर कारवाई टाळावी, असे आवाहन करण्यात आले आहे.
