पुणे : पुण्यातील बिबवेवाडी परिसरातील आई माता मंदिराजवळ मोकळ्या मैदानातील गवताला आग लागल्याची घटना घडली आहे. आज पहाटे ३ वाजण्याच्या सुमारास ही घटना घडली आहे. या घटनेत मोकळ्या जागेत असलेल्या गॅरेजमधील गाड्यांना आग लागली असून यामध्ये गॅरेजमधील १७ चारचाकी वाहने जळून खाक झाली आहेत.
बीएमडब्ल्यु, मर्सिडीज, रेंज रोव्हर, स्कोडा, हुंदाई, फोर्ड या कंपन्याची वाहने जळाली आहेत. ही वाहने दुरूस्तीकरिता आले असल्याचे प्राथमिक माहिती आहे.
मिळालेल्या अधिक माहितीनुसार, आज सकाळी बिबवेवाडी येथील आई माता मंदिराजवळ मोकळ्या मैदानात आग लागल्याची वर्दी अग्निशमन दल नियंत्रण कक्षाला मिळाली. त्यानुसार अग्निशमन दलाकडून दोन वॉटर टँकर रवाना करण्यात आले होते. घटनास्थळी पोहोचताच मोकळ्या जागेत असलेल्या गॅरेजमधील गाड्यांवर चारही बाजूने पाण्याचा मारा करून तीस मिनिटाच्या आत आग आटोक्यात आणण्यात अग्निशमन दलाच्या जवानांना यश आलं. या घटनेत कोणतीही जीवितहानी झाली नाही. मात्र, गॅरेजमधील वाहनांचे मोठ्या प्रमाणावर नुकसान झालं आहे.
