पुणे : जुन्नर शहरात 17 ते 19 फेब्रुवारी दरम्यान छत्रपती शिवाजी महाराज यांच्या 394व्या जयंतीनिमित्त ‘हिंदवी स्वराज्य महोत्सव 2024’ चे आयोजन करण्यात आले आहे. राज्याचे पर्यटन विभाग आणि पुणे जिल्हा प्रशासन यांच्यावतीने ‘हिंदवी स्वराज्य महोत्सव 2024’ चे आयोजन करण्यात आले आहे. तीन दिवस हा महोत्सव सुरू राहणार आहे. या महोत्सवाच्या माध्यमातून महाराष्ट्राची संस्कृती, समृद्ध इतिहासाला उजाळा मिळणार आहे.
कला, संगीत,अध्यात्मविषयक कार्यक्रम
पर्यटनमंत्री गिरीश महाजन म्हणाले, हिंदवी स्वराज्य महोत्सव 2024 हा इतिहास, संस्कृती आणि साहस यांचा सुरेख संगम घडवणारा असेल. 17 ते 19 फेब्रुवारी या तीन दिवसात कला, संगीत, साहस आणि अध्यात्मविषयक विविध कार्यक्रमांचे आयोजन केले आहे. या महोत्सवाला शिवप्रेमी, दुर्गप्रेमी, पर्यटक आणि सर्व नागरिकांनी भेट द्यावी, असे आवाहन पर्यटनमंत्री गिरीश महाजन यांनी केले आहे.
कोणकोणते कार्यक्रम होणार?
हस्तकला प्रदर्शन, पाककृती, कार्यशाळा, क्वाड बायकिंग, पेंटबॉल, तिरंदाजी, गिर्यारोहण, रॅपलिंग, झिपलायनिंग, स्पीड बोटींग, वॉल क्लाईंबिंग अशा साहसी खेळांचा अनुभव, कुकडेश्वर मंदिर, नागेश्वर मंदिर, हरिश्चंद्रेश्वर मंदिर, काशी ब्रह्मनाथ मंदिर, अष्टविनायक मंदिर, लेण्याद्रि मंदिर, ओझर मंदिर, ज्योतिर्लिंग मंदिर, भीमाशंकर मंदिर आणि त्र्यंबकेश्वर मंदिर दर्शन, निरभ्र रात्री लेकसाईड ग्लँपिंग आणि स्टारगेझिंगचा आनंद अनुभवता येणार आहेत. विविध किल्ल्यांची चढाई करत स्वत:ला आव्हान द्यावे किल्ले हडसर, निमगिरी – हनुमंतगड, नाणेघाटासोबत जिवधनगड, कुकडेश्वर मंदिरासोबत चावंडगड. दोन दिवसीय गिर्यारोहण स्पर्धेत सहभागी व्हावे, कँपिंगसोबत हरिश्चंद्रगड ट्रेक आणि हडपसर – निमगिरी – हनुमंतगड – नाणेघाट – जिवधन येथे गिर्यारोहण हा उपक्रम देखील आयोजित केला आहे.
सांस्कृतिक कार्यक्रम आणि बचतगटांचे प्रदर्शन
या महोत्सवात विविध सांस्कृतिक कार्यक्रमांचे आयोजन करण्यात आले आहे. हे सर्व कार्यक्रम शंकरराव बुट्टे पाटील विद्यालय मैदान, तालुका जुन्नर जिल्हा पुणे येथे होणार आहेत. 17 ते 19 फेब्रुवारी 2024 रोजी सकाळी 10 ते रात्री 9 विविध बचत गटांची उत्पादने व खाद्यपदार्थांच्या स्टॉलचे प्रदर्शन असेल.
17 फेब्रुवारी रोजी सायं. 06:30 ते 07 :30 वा. छत्रपतींची मानवंदना शाहीर सुरेश जाधव यांचा पोवाडा पर कार्यक्रम, सायं. 07 :30 ते रात्री 9:30 वा. जाणता राजा महानाट्याचे आयोजन करण्यात आले आहे.
18 फेब्रुवारी 2024 रोजी सायं. 06:30 ते 07:30 वा. गर्जा महाराष्ट्र माझा ही नृत्य नाटिका, सायंकाळी 07:30 ते रात्री 09.30 वा. छत्रपती शिवाजी महाराजांच्या युद्धनीतीचे दर्शन घडवणारा गनिमी कावा या कार्यक्रमांचे आयोजन करण्यात आले आहे.
19 फेब्रुवारी 2024 रोजी सकाळी 9 ते 11 शिवजन्मोत्सव सोहळा, सायं. 06:15 ते 07:00 महा शिवआरती कार्यक्रम, सायं. 06 :30 ते 07:30 वारी सोहळा संताचा (नृत्य), सायं 08 :30 ते 09.30 वा. शिवशंभु शौर्यगाथा-शिव सह्याद्री (महानाट्य) या कार्यक्रमांचे आयोजन करण्यात आले आहे.
