Gold Silver Rate : अमेरिका आणि इस्रायलने इराणवर केलेल्या थेट लष्करी हल्ल्यानंतर मध्यपूर्वेतील परिस्थिती अत्यंत स्फोटक बनली आहे. Israel आणि United States यांच्या कारवाईनंतर Iran नेही आक्रमक भूमिका घेतली असून, काही देशांमधील अमेरिकन लष्करी तळांवर प्रत्युत्तरादाखल हल्ले झाल्याची माहिती समोर येत आहे. त्यामुळे हा संघर्ष केवळ दोन देशांपुरता मर्यादित न राहता संपूर्ण मध्यपूर्वेत पसरू शकतो, अशी भीती आंतरराष्ट्रीय पातळीवर व्यक्त केली जात आहे.
या युद्धजन्य परिस्थितीचे पडसाद थेट जागतिक अर्थव्यवस्थेवर उमटू लागले आहेत. विशेषतः सुरक्षित गुंतवणूक मानल्या जाणाऱ्या सोन्या-चांदीच्या दरात अवघ्या काही तासांत मोठी उसळी पाहायला मिळाली. रशिया-युक्रेन युद्धानंतर गेल्या काही महिन्यांत मौल्यवान धातूंचे दर उच्चांकी पातळीवर गेले होते. त्यानंतर मागील महिन्यात काहीशी घसरण झाली होती. मात्र अमेरिका-इस्रायल-इराण संघर्षाच्या पार्श्वभूमीवर गुंतवणूकदार पुन्हा सोन्या-चांदीकडे वळले असून मागणीत झपाट्याने वाढ झाली आहे.
याच पार्श्वभूमीवर देशांतर्गत बाजारात सोन्याच्या दरात तब्बल रु. 11,000 वाढ झाली असून सोने रु. 175,500 प्रति 10 ग्रॅम या पातळीवर पोहोचले आहे. चांदीच्या दरातही रु.25,000 ची वाढ नोंदवली गेली असून दर रु. 303,000 प्रति किलो पर्यंत गेले आहेत. ही वाढ संघर्षाची ठिणगी पडताच काही तासांत झाली, हे विशेष. युद्ध लांबले तर दर आणखी वाढू शकतात, असा अंदाज सुवर्ण व्यावसायिक व्यक्त करत आहेत.
दरम्यान, इराणमधून आलेल्या वृत्तांनी तणाव अधिकच वाढवला आहे. इराणी माध्यमांच्या माहितीनुसार, इराणचे सर्वोच्च नेते Ayatollah Ali Khamenei यांच्या मृत्यूची अधिकृत पुष्टी करण्यात आली असून त्यांच्या निधनानंतर देशात 40 दिवसांचा राष्ट्रीय शोक जाहीर करण्यात आला आहे. या हल्ल्यात त्यांच्या कुटुंबातील सदस्यांचाही मृत्यू झाल्याचे वृत्त आहे.
या सर्व घडामोडींचा भारतावरही अप्रत्यक्ष परिणाम होऊ शकतो. कच्च्या तेलाच्या किमती, आयात-निर्यात, तसेच सर्वसामान्यांच्या खरेदीक्षमतेवर याचा दबाव येण्याची शक्यता आहे. अचानक वाढलेल्या सोन्या-चांदीच्या दरांमुळे सामान्य ग्राहकांचे बजेट कोलमडले असून, सरकारने दर स्थिर ठेवण्यासाठी पावले उचलावीत, अशी अपेक्षा नागरिक व्यक्त करत आहेत. मध्यपूर्वेतील हा संघर्ष केवळ युद्ध नाही, तर जागतिक राजकारण आणि अर्थव्यवस्थेची दिशा ठरवणारा निर्णायक टप्पा ठरत आहे.
