पुणे : पुण्यातील बी. टी. कवडे रस्ता परिसरात शुक्रवारी दुपारी 3 वाजेच्या सुमारास घडलेल्या एका अत्यंत दुर्दैवी अपघातात 18 वर्षीय हलगी वादकाचा प्राण गेला. विघ्नेश पवार (वय १८, रा. रामटेकडी, हडपसर) असे या अपघातातील मृत तरुणाचे नाव आहे. या हृदयद्रावक घटनेमुळे संपूर्ण हडपसर व घोरपडी परिसरावर शोककळा पसरली असून गणेश विसर्जन मिरवणुकीच्या उत्साहावर दुःखाचे सावट पसरले आहे.
मिळालेल्या माहितीनुसार, मुंढवा पोलीस ठाण्याच्या हद्दीत बी. टी. कवडे मार्गावरून एका गणेश मंडळाची विसर्जन मिरवणूक मोठ्या उत्साहात जात होती. रामटेकडी येथे राहणारा विघ्नेश हा मिरवणुकीत ट्रॅक्टरला जोडलेल्या ट्रॉलीवर बसून हिरीरीने हलगी वाजवत होता. मिरवणूक काळूबाई चौकात पोहोचली असताना अचानक त्याचा तोल गेला आणि तो थेट चालत्या ट्रॉलीवरून खाली कोसळला.
दुर्दैवाने विघ्नेश थेट ट्रॉलीच्या मागील चाकाखाली आला आणि ते जड चाक त्याच्या छातीवरून गेले. हा अपघात इतका भीषण होता की तो गंभीररीत्या दुखावला गेला. तेथे उपस्थित असलेल्या नागरिकांनी त्याला तत्काळ जवळच्या रुग्णालयात दाखल केले, परंतु उपचारापूर्वीच त्याचा मृत्यू झाल्याचे डॉक्टरांनी घोषित केले.
या घटनेची माहिती मिळताच मुंढवा पोलीस ठाण्याच्या पथकाने घटनास्थळी धाव घेऊन घटनेचा पंचनामा केला. पोलिसांनी या प्रकरणी अपघाताची नोंद केली असून, घटनेचा पुढील कायदेशीर तपास सुरू केला आहे. एका उगवत्या तरुण कलाकाराचा अशा प्रकारे अनपेक्षित मृत्यू झाल्याने स्थानिक रहिवाशांमधून तीव्र हळहळ व्यक्त केली जात आहे.
