गणपतीबाप्पा मोरया, पुढच्या वर्षी लवकर या जयघोषात भक्तीमय वातावरणात गणरायाला भावपूर्ण निरोप..!

सुरेश घाडगे

परंडा : गणपती बाप्पा मोरया, पुढच्या वर्षी लवकर या जयघोषात भक्तीमय वातावरणात शहरातील विविध गणेश मंडळानी स्ववाद्य, गणरायाला विसर्जित करून भावपूर्ण निरोप दिला. सलग दोन वर्षाच्या कोरोना खंडानंतर आलेल्या सार्वजनिक गणेश उत्सवात विविध गणेश मंडळाने मोठया जल्लोषात उत्साहात मिरवणुकीत सहभाग नोंदवला. लक्षवेधी पारंपरिक वाद्यासह मोठ्या जल्लोषात भव्य मिरवणुका काढल्या.

शहरातील छत्रपती शिवाजी नगर गणेश मंडळ, राजापुरा बालवीर गणेश मंडळ, शिवछत्रपती गणेश मित्र मंडळ, जय भवानी गणेश मंडळ, नृसिंह गणेश मंडळ, समर्थ तरूण गणेश मंडळ, जय हनुमान टेंबे गणेश मित्र मंडळ, श्रीराम गणेश मित्र मंडळ,मोरया ग्रुप तरुण गणेश मंडळ, गारभवानी गणेश मित्र मंडळ, नरविर तरुण गणेश मंडळ, जय मल्हार गणेश मंडळ, यशवंत गणेश मंडळ, हंसराज गणेश मंडळ, विठ्ठल गणेश आदि मंडळांनी विसर्जन केले. शहरातील मंडई चौक येथे गणेश मंडळ पदाधिकारी यांचा सत्कार मुस्लीम समाजाच्या वतीने करण्यात आला.

दरम्यान, परंडा पोलीस ठाणे अंतर्गत असलेल्या परवानाधारक ६८ गणेश मंडळासह एकूण ८० मंडळांनी गणेश विसर्जन केले. पोलीस ठाण्याच्या हद्दीत कोठेही अनुचित प्रकार घडला नाही.तसेच आनंदमय वातावरणात वरुणराजाच्या हजेरीत गणराजाचे विसर्जन करण्यात आले.