सागर जगदाळे
भिगवण : भादलवाडी (ता. इंदापूर) येथे पद्मश्री डॉ सुभाष पाळेकर यांच्या मार्गदर्शनाखाली रामकृष्ण महादेव येकाळे यांच्या शेतात रविवारी (ता.२१) शिवार फेरी संपन्न झाली.
या शिवार फेरी मध्ये राज्यस्थान , उत्तर प्रदेश, बिहार, मध्ये प्रदेश, गुजरात , कर्नाटक इत्यादी राज्यातील शेतकऱ्यांसह नेपाळ व बांगलादेश येथील शेतकरी उपस्थित होते. या शिवार फेरीमध्ये ५०० पेक्षा जास्त स्त्री व पुरुष शेतकऱ्यांनी सहभाग घेतला होता.
भादलवाडी येथे रामकृष्ण महादेव येकाळे [सर ] हे तीन वर्षांपासून डॉ सुभाष पाळेकर कृषी तंत्रज्ञानाने शेती करत आहेत.त्यासाठी जीवामृत, आच्छादन, वापसा , दशपर्णी, अर्क निमास्त्र यांचा वापर करतात.
शेतात ५५० पेक्षा जास्त प्रकारच्या वनस्पतींची लागवड केलेली आहे.
त्यामध्ये १५० प्रकारचे देशी वृक्ष , १०० प्रकारची फुलझाडे, १०० प्रकारच्या आयुर्वेदिक वनस्पती, 201 प्रकारची फळझाडे आहेत.
शेतामध्ये लागवड केलेले वृक्ष देशभरातून जमा केलेली आहेत. त्यामध्ये अजान वृक्ष ,बोधी वृक्ष,कौशी, उंडी, दक्षिण मोट, रक्तरोहीडा ,भुत्या ,हळद, काटे सावर,काळा व पांढरा पळस ,आष्टा,अर्जुन ,बाबळ, वारस, पुत्रं जीवा,बुच पांगारा ,गोरख चिंच, कोकम, पपनस,आंबाडा,भिमसेनी कापूर ,लाल आवळा,कुंकु फळ, फालसा ,हिरडा, बेहडा, इत्यादी बरोबर आंब्याच्या ४२जाती आहेत.
दरम्यान, यावेळी बोलताना पद्मश्री सुभाष पाळेकर म्हणाले की, भादलवाडी येथे रामकृष्ण महादेव येकाळे (सर) यांच्या शेतावर S.P.K चे पहीले अभ्यास केंद्र सुरू होईल. हे केंद्र देशभरातील शेतकऱ्यांसाठी आदर्श असेल.
यावेळी उपस्थित वासुदेव ( नाना) काळे (प्रदेशाध्यक्ष किसान मोर्चा भाजपा), महेश कन्हेरकर ( अध्यक्ष स्पंदन ) , शिवाजी कन्हेरकर (सरपंच भादववाडी) प्रविण पाटील (माजी सरपंच भादलवाडी ) सोमनाथ कुताळ , यांसह तालुक्यातील बहुसंख्य शेतकरी ,शिक्षक उपस्थित होते. कार्यकाचे प्रस्ताविक रामकृष्ण येकाळे ( सर) यांनी केले. आभार धीरज जाधव यांनी मानले तर सुत्रसंचलन श्री दत्तात्रेय जाधव यांनी केले.
