लोणी काळभोर : लोणी काळभोर (ता. हवेली) येथील MIT कॉर्नर परिसरातील एका इमारतीच्या टेरेसवर तीन विद्यार्थिनी उंच कड्यावर बसून धूम्रपान करत असल्याचा व्हिडिओ समोर आला असून, त्यामुळे परिसरात खळबळ उडाली आहे. हा व्हिडिओ *’पुणे प्राईम न्यूज’*च्या हाती लागला असून, त्यामध्ये विद्यार्थिनी टेरेसच्या कडेला बसणे, लोळणे आणि सिगारेट ओढताना दिसत असल्याचा दावा करण्यात आला आहे.
व्हिडिओतील दृश्यांवरून संबंधित विद्यार्थिनींनी स्वतःचा जीव धोक्यात घातल्याचे दिसून येत आहे. टेरेसच्या अगदी कडेला बसून केलेला हा प्रकार अत्यंत धोकादायक असून, क्षणभर तोल गेला असता तर मोठी दुर्घटना घडण्याची शक्यता नाकारता येत नाही, अशी प्रतिक्रिया स्थानिक नागरिकांकडून व्यक्त केली जात आहे.
प्राथमिक माहितीनुसार, या विद्यार्थिनी लोणी काळभोर परिसरातील एका मोठ्या शैक्षणिक संस्थेत शिक्षण घेत असल्याची चर्चा आहे. मात्र, संबंधित संस्थेकडून याबाबत अधिकृत दुजोरा मिळालेला नाही. या घटनेमुळे विद्यार्थ्यांच्या सुरक्षिततेचा आणि कॅम्पसबाहेरील वर्तनाचा प्रश्न पुन्हा ऐरणीवर आला आहे. परिसरातील नागरिकांनी शैक्षणिक संस्था, पालक आणि संबंधित प्रशासनाने विद्यार्थ्यांमध्ये जनजागृती करून अशा प्रकारांना आळा घालण्याची मागणी केली आहे.
दरम्यान, या व्हिडिओची सत्यता आणि त्यातील विद्यार्थिनींची ओळख संबंधित यंत्रणांनी पडताळणे आवश्यक असून, सार्वजनिक ठिकाणी धोकादायक कृत्ये आणि अल्पवयीन अथवा तरुणांमधील व्यसनाधीनतेच्या वाढत्या प्रवृत्तीबाबतही गंभीर चर्चा सुरू झाली आहे.
