यवत : पत्नी दुसऱ्या तरुणासोबत राहण्यास गेल्याच्या रागातून पतीने विवाहितेचा डोक्यात दगड घालून खून केल्याची घटना उघडकीस आली आहे. पुणे-सोलापूर महामार्गावरील बोरीभडक (ता. दौंड) गावच्या हद्दीत शुक्रवारी (ता. 07) संध्याकाळी साडेनऊ वाजण्याच्या सुमारास ही घटना घडली. या प्रकरणी यवत पोलिसांनी आरोपी पतीला तातडीने बेड्या ठोकल्या आहेत.
शंकर बकस सिंग (वय 22, मूळ रा. खवपूर, ता. मोहम्मदपूर, जि. अमेठी, राज्य – उत्तर प्रदेश) असे अटक करण्यात आलेल्या आरोपी पतीचे नाव आहे. तर आचल यादव (वय -18) असे खून झालेल्या तरुणीचे नाव आहे. याबाबत रोहन मच्छिंद्र गवळी, वय 22 वर्ष, व्यवसाय मजुरी (सुनिल अरोरा यांचे कुरकुरे कंपनी) सध्या रा. पाईप कारखानाजवळ, तुषार चौधरी यांचे भाडयाचे खोलीत, नायगाव, ता. हवेली जि. पुणे मुळ रा. सारनी, ता. औसा जि. लातुर) यांनी यवत पोलीस ठाण्यात फिर्याद दिली.
पोलिसांनी दिलेल्या माहितीनुसार, मयत आचल यादव हिचे आरोपी शंकर सिंग याच्याशी लग्न झाले होते. मात्र, कौटुंबिक वादानंतर आचल ही पतीला सोडून फिर्यादी रोहन गवळी याच्यासोबत राहू लागली होती. याच गोष्टीचा राग धरून आरोपी शंकर सिंग याने शुक्रवारी रात्री साडेनऊ वाजण्याच्या सुमारास बोरीभडक (ता. दौंड) गावच्या हद्दीत पुणे-सोलापूर हायवेवरील सोलापूरकडे जाणाऱ्या लेनपासून 150 मीटर अंतरावर असलेल्या एका मोकळ्या जागेत आचलला गाठले.
तेथे आरोपी शंकर सिंग याने आचल यादव हिला गाठून अश्लील भाषेत शिवीगाळ करत जीवे मारण्याची धमकी दिली. वाद विकोपाला गेल्यानंतर संतापलेल्या शंकरने जवळच पडलेला मोठा दगड आचलच्या डोक्यात घातला. दगडाच्या प्राणघातक हल्ल्यात गंभीर दुखापत झाल्याने 18 वर्षीय आचल हिचा रक्ताच्या थारोळ्यात पडल्याने जागीच मृत्यू झाला.
दरम्यान, या प्रकरणी रोहन मच्छिंद्र गवळी यांनी दिलेल्या फिर्यादीवरून यवत पोलीस ठाण्यात आरोपीविरुद्ध विविध कलमान्वये गुन्हा नोंदवण्यात आला आहे. गुन्ह्याचे गांभीर्य ओळखून यवत पोलिसांनी आरोपी शंकर सिंग याला बेड्या ठोकल्या. पोलिसांनी आरोपीला न्यायालयात हजर केले असता, न्यायालयाने त्याला बुधवार (ता. 12) पर्यंत पोलीस कस्टडी रिमांड मंजूर केली आहे. यवत पोलीस ठाण्याचे पोलीस उपनिरीक्षक सागर माने या प्रकरणाचा पुढील तपास करत आहेत.
