Dhurandhar 2 box office collection : अभिनेता रणवीर सिंगच्या धुरंधर या चित्रपटाने बॉक्स ऑफिसवर असा काही पराक्रम केला आहे जो गेल्या अनेक वर्षांपासून बॉलिवूडला जमला नव्हता. गेल्या काही काळापासून भारतीय चित्रपटसृष्टीवर दाक्षिणात्य चित्रपटांचे वर्चस्व पाहायला मिळत होते. साऊथच्या चित्रपटांमधील भव्यता आणि विषय प्रेक्षकांना आकर्षित करत होते. मात्र धुरंधर चित्रपटाने पुन्हा एकदा प्रेक्षकांना बॉलिवूड चित्रपटांकडे वळवले असून थिएटरबाहेर प्रेक्षकांच्या लांबच लांब रांगा पाहायला मिळत आहेत.
हा चित्रपट प्रदर्शित होऊन आता 3 आठवडे उलटले आहेत तरीही प्रेक्षकांमधील याची क्रेझ अजिबात कमी झालेली नाही. अनेक ठिकाणी अजूनही हाऊसफुल्लचे बोर्ड पाहायला मिळत आहेत. धुरंधर 2 या चित्रपटाने आतापर्यंत भारतीय सिनेमाच्या इतिहासात आपला दबदबा निर्माण केला आहे. हा चित्रपट आता सर्वाधिक कमाई करणाऱ्या टॉप 3 चित्रपटांच्या यादीत स्थान मिळवण्यासाठी सज्ज झाला आहे. रणवीर सिंगच्या या स्पाय थ्रिलर चित्रपटाने जगभरात तब्बल 1564 कोटी रुपयांची अवाढव्य कमाई केली आहे.
इतकी मोठी कमाई करूनही धुरंधर 2 चित्रपट सध्या सर्वाधिक कमाई करणाऱ्या चित्रपटांच्या यादीत चौथ्या क्रमांकावर आहे. या यादीत पहिल्या क्रमांकावर आमिर खानचा दंगल चित्रपट असून त्याने 2200 कोटींची कमाई केली आहे. दुसऱ्या क्रमांकावर प्रभासचा बाहुबली 2 असून त्याचे कलेक्शन 1810 कोटी रुपये आहे. तर तिसऱ्या क्रमांकावर अल्लू अर्जुनचा पुष्पा 2 चित्रपट असून त्याने 1700 कोटींहून अधिक गल्ला जमवला आहे.
धुरंधर 2 ला आता पुष्पा 2 चा रेकॉर्ड मोडण्यासाठी फक्त काही कोटींच्या कमाईची गरज आहे. ज्या वेगाने हा चित्रपट बॉक्स ऑफिसवर धावतोय ते पाहता लवकरच तो बाहुबली २ ला देखील तगडी टक्कर देण्याची शक्यता निर्माण झाली आहे. या चित्रपटामुळे बॉलिवूडला पुन्हा एकदा सुवर्णकाळ अनुभवायला मिळत असून रणवीर सिंगच्या अभिनयाचे सर्वत्र कौतुक होत आहे. येत्या काही दिवसात हा चित्रपट कमाईचे कोणते नवीन विक्रम प्रस्थापित करतो याकडे आता सर्वांचे लक्ष लागले आहे.
