पुणे : दिनांक 1 एप्रिल 2019 पूर्वी नोंदणी झालेल्या सर्व जुन्या वाहनांवर उच्च सुरक्षा नोंदणी क्रमांक पाटी (HSRP) बसवणे बंधनकारक करण्यात आले आहे. यासाठी पूर्वी 31 मार्च 2025 ही अंतिम मुदत दिली होती. त्यानंतर संदर्भीय परिपत्रक क्रमांक 3 नुसार 15 ऑगस्ट 2025 पर्यंत मुदतवाढ देण्यात आली होती. आता विविध कारणास्तव ही मुदत आणखी वाढवण्यात आली असून, 30 नोव्हेंबर 2025 ही नवीन अंतिम तारीख निश्चित करण्यात आली आहे.
राज्यातील अनेक जुन्या वाहनांवर अजूनही HSRP बसवण्याचे काम बाकी आहे. शहरी भागांमध्ये अनेक वाहन मालकांना पुढील काही महिन्यांसाठीच बसवण्याची अपॉइंटमेंट मिळाली आहे. ग्रामीण भागात फिटमेंट केंद्र सुरू होण्यास उशीर झाला आहे, तर काही केंद्रे बंद पडल्याची माहिती समोर आली आहे. लोकप्रतिनिधी आणि नागरिकांकडून मुदतवाढीची मागणीही करण्यात आली होती.
परिवहन विभागाच्या माहितीनुसार, 30 नोव्हेंबर 2025 पर्यंत HSRP बसवलेले नसलेले वाहन आढळल्यास 1 डिसेंबर 2025 पासून वायुवेग पथकाद्वारे कायदेशीर कारवाई केली जाईल. मात्र, या तारखेपर्यंत HSRP बसवण्यासाठी अपॉइंटमेंट मिळालेल्या वाहनमालकांवर कोणतीही कारवाई होणार नाही.
यापूर्वीच, HSRP न बसवलेल्या वाहनांवर हस्तांतरण, कर्ज बोझा चढवणे किंवा उतरवणे यासारख्या कामांवर निर्बंध घालण्यात आले आहेत. आता पुढे अशा वाहनांच्या पुनर्नोंदणी, वाहनांमध्ये बदल, परवाना नूतनीकरण इत्यादी सर्व कामे (योग्यता प्रमाणपत्र नूतनीकरण वगळता) थांबवली जातील. तसेच वाहन तपासणीमध्ये जप्त झालेली वाहने HSRP बसवल्याशिवाय सोडण्यात येणार नाहीत.
परिवहन विभागाने सर्व प्रादेशिक आणि उपप्रादेशिक परिवहन अधिकाऱ्यांना आपल्या कार्यक्षेत्रात या निर्णयाची व्यापक जनजागृती करण्याचे निर्देश दिले आहेत. स्थानिक वाहन वितरक, ऑटो रिक्षा, टॅक्सी, बस आणि ट्रक संघटनांसोबत बैठक घेऊनही हा निर्णय सर्वांपर्यंत पोहोचवण्यात येईल. वाहनमालकांच्या HSRP बसवण्यासंबंधी काही तक्रारी असल्यास त्या dytccomp.tpt-mh@.gov.in या ईमेलवर पाठवता येतील.
