पुणे : पहिल्यांदाच मतदार यादीत नाव नोंदवू इच्छिणाऱ्या नागरिकांसाठी निवडणूक आयोगाने एक अत्यंत महत्त्वाचा आणि दिलासादायक निर्णय घेतला आहे. ज्या राज्यांमध्ये ‘विशेष संक्षिप्त पुनरीक्षण’ची प्रक्रिया पूर्ण झाली आहे, तेथील ECINET पोर्टलवरून फॉर्म 6 सोबत जोडण्यात आलेले अतिरिक्त SIR घोषणापत्र आता पूर्णपणे हटवण्यात आले आहे.
नवीन मतदार नोंदणीसाठी भरल्या जाणाऱ्या फॉर्म 6 सोबत SIR संदर्भातील ‘Annexure D’ हे अतिरिक्त पत्र जोडण्यात आले होते. या पत्रात अर्जदाराला स्वतःच्या किंवा आपल्या आई-वडील, आजी-आजोबा यांच्या जुन्या मतदार यादीतील नोंदींविषयीची माहिती देणे सक्तीचे केले जात होते. ऑनलाइन पोर्टलवर हे पत्र ऐच्छिक असल्याचे म्हटले असले, तरी ही माहिती भरल्याशिवाय अर्ज जमाच होत नव्हता. त्यामुळे नागरिकांमध्ये मोठा गोंधळ निर्माण झाला होता.
या समस्येची गंभीर दखल घेत निवडणूक आयोगाने 26 सप्टेंबर रोजी महत्त्वपूर्ण घोषणा केली. त्यानुसार मतदार नोंदणी नियम, 1960 च्या मूळ तरतुदींनुसारच अर्ज प्रक्रिया राबवण्याचे स्पष्ट करण्यात आले. या घोषणेनंतर अवघ्या चार दिवसांत, म्हणजेच मंगळवारी रात्री उशिरा आयोगाने हे अतिरिक्त घोषणापत्र पोर्टलवरून काढून टाकण्यात आले.
ज्या राज्यांमध्ये SIR चे काम पूर्ण झाले आहे, तिथे आता ECINET पोर्टलवर पूर्वीप्रमाणेच साधा आणि सोपा फॉर्म 6 उपलब्ध झाला आहे. त्यामुळे आता नवीन मतदारांना जुन्या नोंदींविषयीची कोणतीही अतिरिक्त माहिती देण्याची गरज उरणार नाही. नागरिक आता सहज आणि सोप्या पद्धतीने आपली मतदार नोंदणी करू शकतील.
