पुणे : पुणे महापालिका आणि पोलिसांकडून वाहतुकीचा प्रश्न सोडवण्यासाठी विविध उपाययोजना केल्या जात आहेत.शहरातील पुणे आंतरराष्ट्रीय विमानतळ परिसरातील कोंडी सोडवण्यासाठी आता पोलीस प्रशासनाने कंबर कसली आहे. या पार्श्वभूमीवर विमानतळाच्या नवीन टर्मिनल परिसरातील रस्त्यावर सर्व प्रकारची वाहने लावण्यास मनाई करण्याचा निर्णय पोलीस आयुक्त अमितेश कुमार यांनी घेतला आहे. त्यानुसार या भागात रिक्षा, तसेच मोटारी लावण्याचे आदेश देण्यात आले आहेत. त्यामुळे आता विमानतळ परिसरातील कोंडी सुटणार असल्याचं दिसून येत आहे.
पुणे विमानतळ परिसरात वाहतूक कोंडी होत असल्याच्या तक्रारी गेल्या काही दिवसांपासून येत होत्या. या पार्श्वभूमीवर आता पोलीस प्रशासनाने उपायोजना केल्या आहेत.विमानतळावरील नवीन टर्मिनलवर प्रवाशांना मोटारीेने सोडण्याची परवानगी आहे. मात्र, तेथून प्रवाशांची वाहतूक करण्याची मुभा नाही. प्रवाशांना कॅब सेवा घेण्यासाठी एरोमाॅल परिसरात जावे लागते. नवीन टर्मिनल ते एरोमाॅल दरम्यान अंतर आहे. त्यामुळे तेथे दोन इलेक्ट्रिक बस आणि सहा गोल्फ कार्टची सुविधा उपलब्ध करून देण्यात आली आहे. ही सेवा निशुल्क असून, प्रवाशांना नवीन टर्मिनलमधून एरोमाॅलपर्यंत जाता येणार आहे.
दरम्यान या विमानतळ भागातील कोंडी सोडविणे, तसेच उपाययोजना करण्यासाठी पोलीस आयुक्त अमितेश कुमार यांनी बैठकीचे आयोजन केले होते. या भागातील समस्या सोडविण्यात याव्यात, तसेच सर्व प्रकारची वाहने उभी करण्यास मनाई करण्यात यावी, असे आदेश पोलीस आयुक्त अमितेश कुमार यांनी दिले. त्यामुळे वाहतूक कोंडीचा प्रश्न आता लवकरच मिटणार आहे.
