पुणे : दिल्ली-पुणे इंडिगो विमानात एका प्रवाशाने हवेत असतानाच आणीबाणीचा (इमर्जन्सी) दरवाजा उघडण्याचा प्रयत्न केल्याची खळबळजनक घटना उघडकीस आली आहे. या गंभीर प्रकारामुळे विमानातील शेकडो प्रवाशांचा जीव धोक्यात आला होता. सुदैवाने, वेळीच प्रसंगावधून मोठा अनर्थ टळला.
मिळालेल्या माहितीनुसार, आरोपी प्रवाशाचे नाव गौरव सत्येंद्र रावते असे असून तो दिल्लीवरून पुण्याच्या दिशेने येणाऱ्या इंडिगो विमानाने प्रवास करत होता. उड्डाणादरम्यान अचानक त्याने विमानाचा आपत्कालीन दरवाजा उघडण्याची हालचाल केली. त्याच्या या कृत्यामुळे विमानात एकच घबराट पसरली. विमानातील कर्मचारी आणि इतर प्रवाशांनी तत्परता दाखवत त्याला तात्काळ थांबवले, ज्यामुळे होणारी मोठी दुर्घटना टळली.
विमान पुण्यातील लोहगाव विमानतळावर सुरक्षितपणे उतरल्यानंतर या प्रवाशाला पोलीस आणि सुरक्षा यंत्रणांच्या स्वाधीन करण्यात आले. या निष्काळजी आणि धोकादायक वर्तनाबद्दल आरोपी गौरव रावते याच्याविरुद्ध विमानतळ पोलीस ठाण्यात विविध कलमांनुसार गुन्हा दाखल करण्यात आला असून पोलीस पुढील तपास करत आहेत.
हवा आणि दाबाच्या कारणास्तव प्रवासादरम्यान असा दरवाजा उघडल्यास विमानाचा समतोल बिघडून सर्व प्रवाशांच्या जीवाला मोठा धोका निर्माण होऊ शकतो.
