जळगाव: जळगाव जिल्ह्यातील चाळीसगावमध्ये एका धक्कादायक प्रकारामुळे राजकारण ढवळून निघाले आहे. शिवसेनेचे (शिंदे गट) नेते माजी खासदार उन्मेष पाटील यांच्याविरुद्ध चाळीसगाव शहर पोलीस ठाण्यात कायदेशीर कारवाई करण्यात आली आहे. रविवारी रात्री उशिरा पोलिसांनी गुन्हा दाखल केला असून, या घटनेने संपूर्ण जिल्ह्यात खळबळ उडाली आहे. पोलीस अधीक्षक श्रीकांत धिवरे यांनी या माहितीला दुजोरा दिला आहे.
२८ जून रोजी चाळीसगाव पोलीस ठाण्याबाहेर झालेल्या आंदोलनातून निर्माण झाला. आपल्या भाषणात उन्मेष पाटील यांनी पोलीस उपनिरीक्षक संदीप घुले यांच्यावर गंभीर ठपका ठेवला. पीएसआय घुले हे विनाकारण तरुणांना फसवून त्यांच्यावर गुन्हे नोंदवत असल्याचा दावा करत असतानाच, पाटील यांनी त्यांच्यावर एका महिला पोलीस कर्मचारीला शरीर सुखाची मागणी करत असल्याचा अत्यंत गंभीर आरोपही केले. तसेह त्यांना शिवीगाळही केला.
आरोप करताना पाटील यांनी सार्वजनिक भाषणात वापरलेली भाषा अत्यंत आक्षेपार्ह आणि खालच्या पातळीची होती. त्यांचे हे भाषण सोशल मीडियावर मोठ्या प्रमाणात व्हायरल होत आहे. एका पोलीस अधिकाऱ्याचा जाहीर अपमान केल्याच्या कारणावरून, चाळीसगाव पोलिसांच्या गोपनीय शाखेतील एका कर्मचाऱ्याच्या तक्रारीनुसार, भारतीय न्याय संहिता (BNS) च्या कलम ३५२ आणि ३५६(३) अंतर्गत त्यांच्यावर गुन्हा दाखल झाला आहे.
सध्या पोलीस या प्रकरणातील तांत्रिक बाबी तपासत आहेत. सत्ताधारी पक्षातील वजनदार नेत्यावरच पोलिसांशी गैरवर्तन केल्याचा ठपका ठेवल्याने, या प्रकरणाकडे संपूर्ण राज्याचे लक्ष लागले आहे. आता उन्मेष पाटील यावर काय भूमिका घेतात आणि या राजकीय वादाचे वळण पुढे काय असेल, हे पाहणे महत्त्वाचे ठरेल.
