पुणे : पुण्यातील बीआरटी मार्ग हा सार्वजनिक वाहतूक कोंडी सोडविण्यासाठी अत्यंत आवश्यक आहे त्यामुळे कोणत्याही परिस्थितीत बीआरटी मार्ग बंद करता येणार नाही. त्यामुळे हा मार्ग हा सुरूच राहणार आहे. अशी माहिती महापालिका आयुक्त, प्रशासक विक्रम कुमार यांनी दिली.
वाहतूक कोंडी सोडविण्यासाठी आणि जलदगतीने प्रवास करता यावा यासाठी बस रॅपिड ट्रान्झिट- बीआरटी सेवा सुरू करण्यात आली असली तरी शहरातील वाहतूक कोंडीला बीआरटी मार्ग कारणीभूत असल्याचा ठपका ठेवत पोलिसांनी या वाहतूक कोंडीचे खापर महापालिकेवर फोडण्यात आले होते. यावेळी पोलिसांनी वाहतूक कोंडी कमी करायची असेल तर, सर्व बीआरटी मार्ग बंद करा आणि अनावश्यक सायकल मार्ग काढून टाका, असे पत्र पोलिसांनी महापालिकेला पाठविले होते.
बीआरटी मार्ग बंद करण्याच्या संदर्भात महापालिका प्रशासनाने सार्वजनिक वाहतूक करणाऱ्या पीएमपीकडे विचारणा केली होती. त्यावर पीएमपी प्रशासनाने मार्ग कायम ठेवताना मात्र काही गाड्यांना मार्गातून जाण्या-येण्यास परवानगी द्यावी, अशी सूचना महापालिका प्रशासनाला केली आहे.
पुण्यातील वाहतूक कोंडी टाळण्यासाठी कोट्यवधी रुपये खर्च करून विकसित बीआरटी मार्ग तयार करण्यात आला आहे. तसेच सार्वजनिक वाहतूक व्यवस्थेतील पीएमपीचा बीआरटी हा महत्त्वाचा घटक आहे. त्यामुळे तो बंद करता येणार नाही, असे महापालिका आयुक्त, प्रशासक विक्रम कुमार यांनी स्पष्ट केले आहे.
