पुणे : पुणे पदवीधर आणि शिक्षक मतदारसंघाच्या विधानपरिषद निवडणुकीबाबत महत्वाची माहिती समोर आली आहे. या निवडणुकीच्या मतदानाची पद्धत नेहमीच्या सार्वत्रिक निवडणुकांपेक्षा पूर्णपणे वेगळी असते. या निवडणुकीत ईव्हीएम मशीनऐवजी मतपत्रिकेचा वापर केला जातो. त्यामुळे उमेदवाराच्या नावासमोरील बटण दाबणे किंवा शिक्का मारणे असे प्रकार येथे चालत नाहीत. मतदारांना मतपत्रिकेवर आपल्या पसंतीचा क्रमांक नोंदवून मतदान करावे लागते.
निवडणूक प्रक्रियेत अगदी लहान चुकीमुळेही मत बाद होऊ शकते. त्यामुळे सर्व मतदारांनी, विशेषतः पहिल्यांदाच मतदान करणाऱ्यांनी, मतदानाची योग्य नियमावली समजून घेणे आवश्यक आहे, असे आवाहन विभागीय आयुक्त तथा निवडणूक निर्णय अधिकारी शीतल तेली-उगले यांनी केले आहे.
त्यानुसार मतदाराने आपल्या आवडत्या कोणत्याही एकाच उमेदवाराच्या नावासमोरील रकान्यात 1 हा इंग्रजी आकडा लिहिणे अत्यंत आवश्यक आहे.पहिल्या पसंतीनंतर मतदार आपल्या इच्छेनुसार 2, 3, 4 असे पुढील क्रमांक इतर उमेदवारांना देऊ शकतात. सर्वच उमेदवारांना पसंतीक्रम देणे बंधनकारक नाही, परंतु 1 हा क्रमांक देणे अनिवार्य आहे.
मतपत्रिकेवर पसंतीक्रम नोंदवण्यासाठी केवळ निवडणूक केंद्रावर अधिकाऱ्यांकडून मिळणाऱ्या जांभळ्या रंगाच्या स्केच पेनचाच वापर करावा. स्वतःचे बॉलपेन, जेलपेन, पेन्सिल किंवा इतर रंगाचा पेन वापरल्यास मत बाद होईल.तसेच उमेदवाराच्या नावासमोर टिकमार्क (✓) किंवा फुली (X) अशी खूण करू नये.
तसेच पसंतीक्रम ‘एक’ किंवा ‘दोन’ असा अक्षरांत न लिहिता 1, 2 अशा इंग्रजी आकड्यांतच लिहावा.एकापेक्षा जास्त उमेदवारांच्या समोर 1 हा क्रमांक लिहिल्यास मत पत्रिका रद्द होईल. मतपत्रिकेवर स्वतःचे नाव, सही, आद्याक्षरे, अंगठ्याचा ठसा किंवा इतर कोणताही मजकूर लिहू नये.
मतदान करताना कोणतीही घाई न करता सर्व सूचना व्यवस्थित वाचूनच आपले मत नोंदवावे, असे आवाहन प्रशासनाने केले आहे
