बारामती : बारामती शहर पोलीस ठाण्यातील महिला पोलीस कर्मचाऱ्याचा डेंग्यू आजाराने मृत्यू झाल्याची दुख:द घटना मंगळवारी (ता. २०) घडली आहे. त्यांच्या निधनानं अवघ्या दहा दिवसांपूर्वी जन्मलेले बालक पोरक झाले आहे.
शीतल जगताप गलांडे असे या महिला पोलीस कर्मचाऱ्याचे नाव आहे. शीतल या प्रसूती रजेवर गेल्या होत्या. शीतल यांच्यावर पुणे शहरातील केईएम रूग्णालयात उपचार सुरू होते. प्रसूतीनंतर त्यांना डेंग्यू आजाराची लागण झाली होती. उपाचारासाठी त्यांना केईम रुग्णालयात दाखल करण्यात आले होते. उपचार सुरू असताना मंगळवारी पहाटे त्यांचे निधन झाले.
शीतल या शहर पोलीस ठाण्याची संपूर्ण संगणकीय प्रणालीचे कामकाज पाहत होत्या. प्रसूतीच्या शेवटच्या दिवसापर्यंत त्या पोलीस ठाण्यात दैनंदिन कामकाज पहात होत्या. पोलीस दलाचे शिस्तप्रिय व जोखमीचे मनाचा व शरीराचा कस लागणारे काम त्या अतिशय प्रसन्न मनाने करायच्या. पोलीस ठाण्यातील वातावरण कायम सौहार्दपूर्ण ठेवण्यामध्ये त्यांचा सिंहाचा वाटा होता.
दरम्यान, त्यांच्या पश्चात पती, एक मुलगी व दहा दिवसापूर्वी जन्मलेले बालक असा परिवार आहे. शासकीय इतमात त्यांचा अंत्यविधी सकाळी दहा वाजता पणदरे इथे करण्यात आला.
