पिंपरी : रात्रगस्तीसाठी रस्त्याच्या कडेला थांबलेल्या पोलीस व्हॅनला मद्यपी रिक्षाचालकाने ठोकरून नुकसान केले. रविवारी (दि. १७) मध्यरात्री साडेबाराच्या सुमारास निगडी अजंठानगर येथे हा प्रकार घडला. या प्रकरणी पोलीस शिपाई आदिनाथ भागवत यांनी निगडी पोलीस ठाण्यात फिर्याद दिली आहे. त्यानुसार महादेव बळी वाघमारे (वय २५, रा अजंठानगर, निगडी) याच्यावर गुन्हा दाखल करण्यात आला आहे.
फिर्यादी भागवत हे अधिकाऱ्यांसमवेत रात्री गस्त घालत होते. अजंठानगर येथे काही लोक थांबलेले दिसले. त्यामुळे भागवत यांनी त्यांची पोलीस व्हॅन जमावाच्या दिशेने नेत रस्त्याच्या कडेला उभी केली. त्यावेळी तिथे आरोपी वाघमारे हा रिक्षा चालवत आला. त्याने त्याच्या ताब्यातील रिक्षाने पोलिसांच्या व्हॅनला धडक दिली. या अपघातात व्हॅनचे मोठे नुकसान झाले. तसेच रिक्षाचालक वाघमारे हा जखमी झाला. त्याने दारू प्राशन केल्याचे निष्पन्न झाले असून गुन्हा दाखल करण्यात आला. सहायक पोलीस निरीक्षक कदम तपास करीत आहेत.
