Ashok Kharat : नाशिकमध्ये वर्षानुवर्षे ‘आध्यात्मिक शक्ती’चा गाजावाजा करत आपलं साम्राज्य उभं करणाऱ्या भोंदूबाबा अशोक खरातच्या काळ्या कृत्यांचा पर्दाफाश ज्या पद्धतीने झाला, ती कहाणी एखाद्या थरारक चित्रपटालाही लाजवेल अशी आहे. विशेष म्हणजे, स्वतःच केलेल्या एका तक्रारीनेच त्याचं सगळं साम्राज्य कोसळलं.
सुरुवात झाली काही ‘View Once’ व्हिडीओ क्लिप्सपासून. खरातच्या महिलांसोबतच्या आक्षेपार्ह हालचालींचे काही व्हिडीओ काही व्यक्तींच्या हाती लागले. त्यांनी हे क्लिप्स त्यालाच व्हॉट्सॲपवर पाठवले. अशा मोडमध्ये की त्या फक्त 1 वेळाच पाहता येतात. खरातने घाईघाईत ते व्हिडीओ पाहिले, पण नंतर ते पुन्हा उघडता आले नाहीत. इथूनच त्याच्या अस्वस्थतेची सुरुवात झाली.
आपल्या प्रभावाच्या जोरावर हे प्रकरण दडपता येईल, असा त्याचा विश्वास होता. त्यामुळे त्याने थेट एका वरिष्ठ पोलीस अधिकाऱ्याकडे जाऊन खंडणीची तक्रार दाखल केली. पण इथेच खेळ पलटला. मोबाईलमधील डेटा रिकव्हर करण्यासाठी सायबर तंत्रज्ञानाचा वापर करण्यात आला आणि जे समोर आलं, ते पाहून अधिकारीही हादरले. क्लिप्समध्ये दिसणारे प्रकार इतके गंभीर होते की, ही फक्त खंडणीची केस नसून त्यामागे मोठं शोषणाचं जाळं असल्याचं स्पष्ट झालं.
सुरुवातीला प्रकरण मिटवण्याचा प्रयत्न झाला, पण तपास जसजसा पुढे गेला, तसतसे धक्कादायक तपशील बाहेर येऊ लागले. अखेर परिस्थिती अशी आली की, तक्रार करणारा खरातच आरोपीच्या पिंजऱ्यात उभा राहिला. लैंगिक शोषण, ब्लॅकमेलिंग आणि फसवणुकीचे आरोप त्याच्यावर निश्चित झाले.
