Ashok Kharat : शिर्डी परिसरात उघडकीस आलेल्या एका धक्कादायक प्रकरणाने श्रद्धा, विश्वास आणि सुरक्षिततेच्या संकल्पनांवरच प्रश्नचिन्ह उभं केलं आहे. स्वतःला आध्यात्मिक मार्गदर्शक म्हणून मांडणाऱ्या अशोक खरात याने आपल्या श्रीमंत भक्तांनाच लक्ष्य करून योजनाबद्ध पद्धतीने फसवणुकीचं जाळं उभं केल्याची माहिती समोर आली आहे.
मिळालेल्या माहितीनुसार, खरातच्या संपर्कात अनेक उद्योगपती आणि आर्थिकदृष्ट्या सक्षम व्यक्ती होत्या. त्यांच्या आर्थिक स्थितीची, व्यवहारांची आणि संपत्तीची सविस्तर माहिती त्याच्याकडे होती. याच माहितीचा गैरवापर करत त्याने आपल्या साथीदारांना बनावट कर अधिकाऱ्यांच्या रूपात पाठवण्याची युक्ती अवलंबली. हे बनावट अधिकारी अचानक छाप्याच्या नावाखाली संबंधित व्यक्तींना धाक दाखवत आणि मोठ्या रकमांची मागणी करत. भीतीपोटी अनेकांनी पैसे दिल्याची शक्यता व्यक्त केली जात आहे.
हा प्रकार केवळ फसवणूक नाही, तर श्रद्धेचा गैरफायदा घेत केलेली संगनमताने चालणारी गुन्हेगारी असल्याचं चित्र समोर येत आहे. विशेष म्हणजे, बदनामीच्या भीतीने अनेक पीडित व्यक्ती अजूनही पुढे येण्यास टाळाटाळ करत असल्याचं दिसतं. त्यामुळे या प्रकरणाचा खरा विस्तार किती मोठा आहे, याचा अंदाज लावणं कठीण झालं आहे.
