पुणे : हगवणे कुटुंबाचा आणखीन एक कारनामा समोर आला आहे. यामुळे हगवणे कुटुंबातील वैष्णवीचा पती शशांक हगवणे आणि सासू लता हगवणे यांच्या अडचणी आणखीन वाढणार आहेत.व्यावसायिक प्रशांत येळवंडे फसवणूक प्रकरणी अन त्यांना बंदुकीचा धाक दाखवल्याप्रकरणी त्यांच्या अटकेसाठी म्हाळुंगे पोलिसांनी पावलं टाकली आहेत. या दोघांचा ताबा मिळावा यासाठी पोलिसांनी पुणे सत्र न्यायालयात अर्ज केला आहे. येत्या सोमवारी यावर सुनावणी होणार आहे.
नेमकं प्रकरण काय?
शशांक हगवणे आणि लता हगवणे यांच्यावर आणखी एक गुन्हा दाखल आहे. व्यवसायिकाची फसवणूक करुन त्याला बंदुकीच्या सहाय्याने धमकावल्याबद्दल गुन्हा दाखल करण्यात आला आहे.लता आणि शशांक हगवणे यांच्या नावावर असलेली जेसीबी मशीन प्रशांत येळवडे यांना विकण्याचा निर्णय मार्च 2022 मधे हगवणे कुटुंबाने घेतला होता. 24 लाख रुपयांना हा जेसीबीचा व्यवहार ठरला होता. प्रशांत येळवंडे यांनी पाच लाख रुपये रोख देऊन जेसीबी हगवणे यांच्याकडून ताब्यात घेतला होता. या जेसीबी मशीनवर बॅंकेचे 19 लाख रुपयांचे कर्ज होते. त्याचे हफ्ते भरण्यासाठी येळवंडे यांनी हगवणेंना 6 लाख 70 हजार रुपये वेगळे दिले होते. मात्र हगवणेंनी हे 6 लाख 70 हजार रुपये बॅंकेत न भरता स्वतःसाठी वापरले. त्यामुळे बॅंकेने ऑगस्ट 2024 मधे जेसीबी मशीन जप्त केली. त्यामुळे प्रशांत येळवंडे यांना 11 लाख सत्तर हजार रुपये मागण्यांसाठी गेले असता शशांकने त्यांना कमरेला असलेल्या पिस्तुलावर हात ठेऊन तू मशीन 14 महिने वापरली आहे. आता पैसे मागु नको नाहीतर घरचे नीट राहणार नाही अशी धमकी दीली होती. प्रशांत येळवंडे यांच्या तक्रारीनंतर म्हाळुंगे एम आय डी सी पोलीस ठाण्यात लता आणि शशांक यांच्या विरोधात फसवणूक आणि धमकावल्याचा गुन्हा दाखल करण्यात आला आहे.
दरम्यान या प्रकरणात आता महाळुंगे चाकण येथे गुन्हा दाखल करण्याची प्रक्रिया सुरू आहे. तर वैष्णवी मृत्यूप्रकरणात वैष्णवीचा पती शशांक हगवणे, दिर सुशील हगवणे, सासरा राजेंद्र हगवणे, सासू लता हगवणे आणि नंतर करिष्मा हगवणे यांना अटक केली असून वैष्णवी चा पती सासू आणि नणंदेची पोलीस कोठडी संपल्यानंतर कोर्टाने त्यांना 14 दिवसाची न्यायालयीन कोठडी सुनावली आहे. तर वैष्णवीचा सासरा आणि दीर पोलीस कोठडीत असून 31 मे पर्यंत त्यांच्या कोठडीत वाढ करण्यात आली आहे.
