पालघर : पालघरमधून भीषण अपघाताची बातमी समोर येत आहे. भरधाव कारने दुचाकी स्वाराला चिरडले. या आपघातामध्ये तरुणाचा जागीच मृत्यू झाला आहे. कामावरून घराकडे जात असताना हा तरुण घरी पोहचू शकला नाही. त्याआधीच त्याच्यावर काळाने घाला घातला. मनोर रोडवरील गणेश घाट येथे अपघाताची ही घटना घडली आहे. अपघातानंतर स्थानिक नागरिकांनी कार चालकाला पकडून मारहाण केली आहे. त्यानंतर त्याला पोलिसांच्या ताब्यात देण्यात आले आहे. मनोर पोलिसांनी कार चालकाविरोधात गुन्हा दाखल करून त्याला अटक केली आहे.
मिळालेल्या माहितीनुसार, पालघरच्या मनोर मार्गावरील गणेश घाट येथे कार आणि दुचाकीचा भीषण अपघात झाला. मध्यरात्री १ च्या सुमारास ही घटना घडली. या अपघातामध्ये वाडा तालुक्यातील चांबले येथील सागर पाटील या तरुणाचा जागीच मृत्यू झाला. सागर पाटील कामावरून घरी परतत असताना त्याला भरधाव कारने जोरदार धडक दिली. त्यात त्याचा जागीच मृत्यू झाला. कार चालक घटनास्थळावरून पळ काढण्याच्या प्रयत्नात असताना स्थानिक नागरिकांनी त्याला पकडून चांगलाच चोप दिला पण त्यानंतरही तो पळून गेला.
दरम्यान, पोलिसांनी मोबाईल ट्रेस करून या चालकाला मनोरजवळील एका हॉटेलमधून अटक केली. आरोपी कार चालकाविरोधात हिट अँड रन प्रकरणात गुन्हा दाखल करावा अशी मागणी मयत सागर पाटील यांच्या कुटुंबीयांकडून करण्यात आली आहे. आरोपी सचिन सुरवसे याला मनोर पोलिसांनी अटक केली आहे.
