ajit pawar : महाराष्ट्राचे माजी उपमुख्यमंत्री स्वर्गीय अजित पवार यांच्या अस्थींचे विधिवत विसर्जन आज उत्तरप्रदेशातील प्रयागराज येथे त्रिवेणी संगमावर करण्यात आले. गंगा, यमुना आणि सरस्वती नद्या एकत्र येणाऱ्या पावन संगमावर हा सोहळा अत्यंत साध्या, पण भावपूर्ण वातावरणात पार पडला. पवार कुटुंबिय आणि राष्ट्रवादी काँग्रेसचे अनेक पदाधिकारी उपस्थित होते.
अजितदादांच्या निधनानंतर राष्ट्रवादी परिवाराने काश्मीर ते कन्याकुमारी अशी देशव्यापी ‘अस्थि-कलश यात्रा’ काढली होती. हरिद्वार पासून सुरू झालेली ही यात्रा आज प्रयागराजमध्ये संपन्न झाली. देशाच्या विविध भागांतील नागरिकांनी या यात्रेत सहभागी होऊन लाडक्या नेत्याला आदरांजली वाहिली.
अस्थि-कलशाचे विधिवत पूजन त्रिवेणी संगमावर पुरोहितांच्या मार्गदर्शनाखाली करण्यात आले. यानंतर युवानेते जय पवार यांनी भावनिक क्षणांत पवित्र अस्थी संगमात अर्पण केल्या. या वेळी उपस्थित कार्यकर्त्यांचे डोळे पाणावले आणि वातावरण अत्यंत भावनिक बनले.
हा सोहळा राष्ट्रवादी युवक काँग्रेसच्या राष्ट्रीय अध्यक्ष धीरज शर्मांच्या नेतृत्वाखाली पार पडला. यावेळी राष्ट्रीय सचिव धनंजय शर्मा, उत्तरप्रदेश राष्ट्रवादी काँग्रेसचे प्रदेशाध्यक्ष हरिश्चंद्र सिंग, भाजपचे काही प्रमुख नेते आणि अनेक पदाधिकारी उपस्थित होते. स्थानिक नागरिकांनीही या सोहळ्यात सहभागी होऊन अजितदादांबद्दल आदर व्यक्त केला.
दरम्यान, दिवंगत उपमुख्यमंत्री अजित पवार यांच्या विमान अपघाताची प्राथमिक चौकशी लवकरच सरकारकडे सादर होणार आहे. विमान अपघात तपास आयोग आणि डीजीसीएची तपासणी सुरू असून ब्लॅक बॉक्सचा डेटा तपासल्यानंतर प्राथमिक अहवाल प्रसिद्ध होईल, असे राज्यमंत्री मुरलीधर मोहोळ यांनी शनिवारी स्पष्ट केले.
या विसर्जनासह अजित पवारांच्या अस्थि-कलश यात्रेचा देशव्यापी प्रवास शांततापूर्णपणे समाप्त झाला.
