लोणी काळभोर, ता. २२ : कौटुंबिक वादामुळे पतीपासून विभक्त राहत असलेल्या २२ वर्षीय महिलेवर भररस्त्यात लोखंडी फायटरने हल्ला करून गंभीर दुखापत केल्याची धक्कादायक घटना कवडीपाट टोलनाक्याजवळ १८ जून रोजी सायंकाळी घडली आहे. एवढेच नव्हे तर, पाच वर्षीय मुलाला उचलून नेण्याची आणि पत्नीला जीवे मारण्याची धमकी दिल्याचाही आरोप करण्यात आला आहे.
रमाकांत ईश्वर शिंदे (वय २४, रा. वारजे माळवाडी) असे गुन्हा दाखल करण्यात आलेल्याचे नाव आहे. याप्रकरणी 22 वर्षीय विवाहितेने लोणी काळभोर पोलिस ठाण्यात फिर्याद दिली आहे. पोलिसांनी दिलेल्या माहितीनुसार, पीडिता या कुंजीरवाडी परिसरात आई व मुलासोबत राहत असून, मांजरी येथील एका वाहन विक्री केंद्रात सेल्सगर्ल म्हणून काम करतात. कौटुंबिक मतभेदांमुळे त्या एप्रिल २०२५ पासून पतीपासून विभक्त राहत आहेत.
पीडिता या कामावरून रिक्षाने कुंजीरवाडीकडे परतत असताना कवडीपाट टोलनाक्याजवळ त्यांच्या पती रमाकांत शिंदे यांनी दुचाकीवरून पाठलाग करत रिक्षा अडवली. मोबाईल फोन तपासण्याच्या कारणावरून व चारित्र्यावर संशय घेत आरोपीने महिलेचा हात पिरगळला, पाठीत व चेहऱ्यावर बुक्क्यांनी मारहाण केली. तसेच हातातील लोखंडी फायटरने डाव्या डोळ्याखाली वार करून जखमी केली.
या मारहाणीनंतर आरोपीने अश्लील शिवीगाळ करत, “पुढच्या वेळी तुझा पाय तोडीन,” अशी धमकी दिली. तसेच वारंवार व्हॉट्सअॅपद्वारे जीवे मारण्याचे संदेश पाठविणे आणि पाच वर्षीय मुलाला उचलून नेण्याची धमकी दिल्याचाही गंभीर आरोप महिलेने केला आहे. याप्रकरणी आरोपीच्या विरोधात लोणी काळभोर पोलीस ठाण्यात भारतीय न्याय संहिता (बी एन एस), 2023 – 115(2),118(1),351(2),351(3),352 प्रमाणे गुन्हा दाखल करण्यात आला आहे.
