पुणे: राज्याच्या राजकारणात गेल्या सहा महिन्यांपासून नाशिक आणि रायगड जिल्ह्यांच्या पालकमंत्रिपदाचा तिढा अजूनही कायम असतानाच, शिंदे गटाचे मंत्री भरत गोगावले यांच्या एका कथित ‘अघोरी पूजे’चा व्हिडिओ व्हायरल झाल्याने नवीन वाद निर्माण झाला आहे. व्हिडीओ व्हायरल झाल्यानंतर राजकीय वर्तुळात मोठी खळबळ उडाली आहे. मंत्री गोगावले आणि राष्ट्रवादीच्या मंत्री आदिती तटकरे यांच्यात या पदावरून रस्सीखेच सुरू आहे. दरम्यान, पालकमंत्रिपद मिळवण्यासाठीच गोगावले यांनी अशा प्रकारची पूजा केल्याचा आरोप विरोधकांकडून केला जात आहे.
रायगडाच्या पालकमंत्रिपदावरून शिवसेना (शिंदे गट) आणि राष्ट्रवादी काँग्रेस (अजित पवार गट) यांच्यातील स्पर्धा तीव्र असताना हा व्हिडिओ समोर आला आहे. व्हायरल झालेल्या व्हिडिओमध्ये मंत्री भरत गोगावले खुर्चीवर बसलेले दिसत आहेत. त्यांच्यासमोर भस्म लावलेले आणि जटाधारी काही साधू विशिष्ट मंत्रपठण करत आहेत, तर आजूबाजूला भगव्या वस्त्रांतील अन्य साधूही उपस्थित आहेत.
दरम्यान, मंत्री भरत गोगावले यांनी त्यांच्यावरील हे सर्व आरोप पूर्णपणे फेटाळून लावले आहेत. “मी कोणतीही अघोरी पूजा केलेली नाही. माझ्या घरी अनेक साधू-संत आणि मान्यवर येत असतात, हा व्हिडिओ त्याच संदर्भातील आहे. तो चुकीच्या पद्धतीने सादर करून गैरसमज पसरवला जात आहे,” असे स्पष्टीकरण गोगावले यांनी दिले आहे.
राष्ट्रवादी काँग्रेस (अजित पवार गट) चे प्रवक्ते सूरज चव्हाण यांनी सोशल मीडियावर शेअर करत जोरदार टीका केली असून पोस्टमध्ये “बाबा भरतशेठ + अघोरी विद्या = पालकमंत्री??” असा उपरोधिक सवाल विचारत गोगावले यांच्यावर अप्रत्यक्षपणे निशाणा साधला आहे. या व्हिडिओमुळे उमटलेल्या या प्रतिक्रियेवर आता काय पडसाद उमटतात, हे पाहणे महत्त्वाचे ठरेल.
