डॉ. अशोक बालगुडे
सांगली : अफजलखानाचा कोथळा छत्रपती शिवाजी महाराजांनी पन्हाळगडाच्या पायथ्याशी काढला, असे विधान भाजप आमदार गोपीचंद पडळकर यांनी केले. त्यावर राष्ट्रवादी काँग्रेसचे (शरदचंद्र पवार) नेते जयंत पाटील यांनी ऐतिहासिक संदर्भ देत त्यांना प्रत्युत्तर दिले. अफजलखानाचा वध पन्हाळगडाच्या नव्हे, तर प्रतापगडाच्या पायथ्याशी झाला, याची आठवण करून देत ‘पुढच्या वेळी जरा चांगला अभ्यास करून या,’ असा टोला पाटील यांनी लगावला.
सांगली जिल्ह्यातील बावची येथे छत्रपती शिवाजी महाराजांच्या स्मारकाच्या लोकार्पण सोहळ्यात दोन्ही नेते एकाच व्यासपीठावर उपस्थित होते. यावेळी पडळकर यांनी शिवरायांच्या इतिहासाचा संदर्भ देताना जयंत पाटील यांच्यावर निशाणा साधला. शत्रू कितीही मोठा असला तरी घाबरायचे नाही; त्याच्या आव्हानाला सामोरे जाऊन मार्ग काढायचा, असा संदेश त्यांनी दिला. राजकीय किंवा आर्थिक संकटातून बाहेर पडण्याचे धैर्य शिवरायांच्या इतिहासातून शिकावे, असेही ते म्हणाले.
दरम्यान, सांगली जिल्हा मध्यवर्ती सहकारी बँकेच्या निवडणुकीत पडळकर यांनी २० मतांनी विजय मिळवला होता. या पार्श्वभूमीवर दोन्ही नेत्यांमधील राजकीय शाब्दिक चकमक चर्चेचा विषय ठरली आहे.
