पुणे – पुणे महानगर पालिकेने बाणेर-पाषण लिंकवरील १५ थकबाकी मिळकतधारकांकडून मंगळवारी (ता.२९) दिवसभरात सव्वा कोटीचा कर वसुली केला आहे. तर २४ मिळकती सील करून धडाकेबाज कामगिरी केली आहे. ही कारवाई महापालिकेच्या कर संकलन विभागाकडून करण्यात आली आहे.
पुणे-मुंबई एक्सप्रेस हायवेवरील बाणेर-पाषण लिंकवरील ही सर्व दुकाने व हॉटेल अनधिकृत उभारण्यात आलेली असल्याने महापालिकेने त्यांना तीनपट दंड आकारला आहे. या मिळकतधारकांना सुमारे ४ कोटी ९० लाखांची बिले महापालिकेकडून देण्यात आली होती.
तसेच, थकबाकी भरण्यासाठी नोटीसाही बजाविण्यात येत होत्या. मात्र, पालिकेच्या नोटीसांना केराची टोपली दाखविली होती. त्याअनुषंगाने कर संकलन विभागाने थेट कारवाईचा बडगा उभारत कर वसूल केला.
हि उल्लेखनीय कामगिरी प्रशासन अधिकारी रवींद्र धावरे, सुनील मते, वसंत सुतार, राजेश कामठे यांच्या नियंत्रणाखाली विभागीय निरीक्षक दीपक आवटे, कमलेश प्रधान, नितीन बोऱ्हाडे, हनुमंत अडगळे, गणेश मांजरे, प्रशांत घाडगे, सागर शिंदे, राजेंद्र पेंडसे, गणेश लाड, विकास खिलारे, भानुदास यादव, आशिष बतीसे, मंगेश चांदेरे, रोहन मकवाना, अवधूत देशपांडे, नवनाथ पाडळे, अतुल दगडे, सतीष दगडे, अजय वाघमारे, किरण दगडे, मंगेश चांदेर, संग्राम देवकर, मीरा पाटील, विकास चांदेरे व औंध बाणेर बालेवाडी क्षेत्रीय कार्यालयातील सर्व पेठ निरीक्षक यांच्या पथकाने संयुक्तपणे ही कारवाई केली.
