बारामती : बारामतीत पुन्हा एकदा राजकीय वातावरण तापण्याची चिन्हे आहेत. येथील प्रसिद्ध श्री सोमेश्वर सहकारी साखर कारखान्याची पंचवार्षिक निवडणूक जाहीर झाली असून, या निवडणुकीच्या निमित्ताने ‘पवार विरुद्ध पवार’ असा सामना पुन्हा एकदा रंगणार आहे.
बारामतीतील सोमेश्वर सहकारी साखर कारखान्याची पंचवार्षिक निवडणूक 2026 मध्ये होणार आहे. या निवडणुकीसाठी 11 ऑक्टोबरला मतदान आणि 12ऑक्टोबरला मतमोजणी होणार आहे.यासाठी अर्ज भरण्याची मुदत 7 ते 11 सप्टेंबरपर्यत असणार आहे.या कारखान्याचे कार्यक्षेत्र बारामती, पुरंदर, खंडाळा आणि फलटण या चार तालुक्यांतील सुमारे 150 गावांमध्ये पसरलेले आहे.एकूण 21जागासाठी ही निवडणूक होणार आहे.यापूर्वी 2021 मध्ये झालेल्या निवडणुकीत अजित पवार यांच्या गटाने दणदणीत विजय मिळवला होता.
राष्ट्रवादी काँग्रेस (शरदचंद्र पवार) पक्षाचे युवा नेते युगेंद्र पवार यांनी ‘शेतकरी पॅनेल’च्या माध्यमातून स्वतंत्र निवडणूक लढवण्याची घोषणा केली आहे. “गेल्या अनेक वर्षांपासून तेच तेच लोक संचालक पदावर आहेत. त्यामुळे तरुण, उच्चशिक्षित आणि अनुभवी उमेदवारांना संधी देऊन बदलाची गरज आहे. माळेगाव कारखान्याप्रमाणे इथे अडचणी येऊ नयेत म्हणून सभासदांच्या हितासाठी हे पाऊल उचलले आहे,” असे युगेंद्र पवार यांनी स्पष्ट केले.
दुसरीकडे, उपमुख्यमंत्री सुनेत्रा पवार यांच्या मार्गदर्शनाखाली अजित पवार गट पूर्ण ताकदीने उतरणार आहे. “अजितदादांनी राजकारण बाजूला ठेवून या कारखान्याला प्रगतीपथावर नेले. तोच वारसा पुढे चालवण्यासाठी आम्ही सर्वसमावेशक पॅनल उभे करू,” असा विश्वास त्यांनी व्यक्त केला आहे.
दरम्यान, आमदार रोहित पवार यांनी ही निवडणूक बिनविरोध व्हावी अशी इच्छा व्यक्त केली आहे. अजितदादांच्या निधनाला अद्याप एक वर्षही पूर्ण झालेले नाही, त्यामुळे सर्व पक्षांनी एकत्र येत दोन्ही बाजूंच्या चांगल्या लोकांना संधी देऊन निवडणूक बिनविरोध करणे हीच अजितदादांना खरी श्रद्धांजली ठरेल, असे मत त्यांनी मांडले.
आता या निवडणुकीमुळे बारामतीतील सहकार क्षेत्रातील सत्तासंघर्ष पुन्हा एकदा ऐरणीवर आला आहे.
