मुंबई: प्रसिद्ध व्यावसायिक आणि औषध विक्रेते विनीत मनोचा यांच्या हत्या प्रकरणात पोलिसांच्या तपासातून धक्कादायक माहिती समोर आली आहे. या हत्येचा कट त्यांच्या सुनेने रचल्याचा पोलिसांचा दावा असून, यासाठी तिने घरातील नोकरासह इतर व्यक्तींची मदत घेतल्याचे तपासात समोर आले आहे. विनीत यांच्या हत्येसाठी एकाच नव्हे, तर तीन वेगवेगळ्या योजना तयार करण्यात आल्या होत्या. प्लान A, प्लान B आणि प्लान C अशा पद्धतीने हा कट आखण्यात आल्याचे सांगण्यात येत आहे.
पोलिसांनी दिलेल्या माहितीनुसार, पहिल्या योजनेत घराबाहेर विनीत यांच्या कारला अपघात घडवून त्यांची हत्या करण्याचा विचार होता. मात्र, सुपारी किलर विशालने हा प्लान नाकारला. अपघात घडवताना स्वतःचा जीव धोक्यात येण्याची शक्यता होती. तसेच पोलिसांच्या तावडीत सापडण्याची भीती असल्याने त्याने हा पर्याय स्वीकारला नाही.
यानंतर दुसरी योजना तयार करण्यात आली. घरात प्रवेश करून उशीने तोंड दाबून विनीत यांची हत्या करायची आणि त्यांचा मृत्यू हृदयविकाराच्या झटक्याने झाल्याचे भासवायचे, असा या योजनेमागील विचार होता. त्यामुळे हत्येचा संशय निर्माण होणार नाही, असा आरोपींचा अंदाज होता.
मात्र, पुढे तिसरी योजना राबवण्यात आल्याचे पोलिसांनी सांगितले. शालू ही 9.36 वाजता पती सुब्रत आणि मुलगा श्रीजय यांच्यासोबत घराबाहेर गेली. त्यानंतर 9.44 वाजता दोघे आरोपी डुप्लिकेट चावीच्या मदतीने घरात दाखल झाले. ते शालूच्या खोलीत जाऊन विनीत यांच्या परतण्याची वाट पाहत बसले. खोलीचा दरवाजा थोडा उघडा ठेवण्यात आला होता, तर लाईट बंद ठेवण्यात आली होती.
सुमारे 74 मिनिटांनी विनीत घरी परतले. कपडे बदलल्यानंतर त्यांनी जेवण केले, मिठाई खाल्ली आणि पाणी प्यायले. त्यानंतर त्यांची नजर सुनेच्या खोलीच्या किंचित उघड्या दरवाजाकडे गेली. आत मांजर गेली असावी, असा त्यांना संशय आला. त्यामुळे त्यांनी खोलीत जाऊन लाईट सुरू केली. त्यावेळी दोन्ही आरोपी त्यांच्या समोर आले. विनीत यांनी त्यांना जाब विचारल्यानंतर विशालने चाकूने हल्ला केल्याचे पोलिस तपासात सांगण्यात आले आहे.
हल्ल्यानंतर विनीत खाली कोसळले. त्यांची हालचाल तपासल्यानंतर आरोपी वेगवेगळ्या दिशेने घराबाहेर गेले. सीसीटीव्हीत आरोपी कैद होण्याचा धोका असतानाही त्यांनी हा प्लान का निवडला, असा प्रश्न पोलिसांनी विचारला. त्यावर उशीने हत्या करण्याची पहिली योजना यशस्वी झाली असती तर शालू हृदयविकाराचा बनाव करून मृत्यूचे कारण वेगळे दाखवणार होती, त्यामुळे तपासाची शक्यता कमी राहिली असती, असा दावा आरोपींनी केल्याचे पोलिसांनी सांगितले.
