पुणे: पुण्यातून पुन्हा एकदा माणुसकीला काळीमा फासणारी घटना समोर आली आहे. पर्वती परिसरात एका 35 वर्षीय गतिमंद महिलेच्या असहायतेचा फायदा घेत तिच्यावर घरातच अत्याचार करण्यात आला असल्याचे समोर आले आहे. मंगळवारी 14 एप्रिल रोजी सायंकाळच्या वेळी ही धक्कादायक घटना घडली.
पर्वती पायथ्याशी राहणारी पीडित महिला घरात एकटी असल्याची संधी साधून धीरज लोंढे या नराधमाने तिला गाठले. पीडितेची मानसिक स्थिती ठीक नसल्याचे ओळखून त्याने तिला धमकावले आणि तिच्याच घरात तिच्यावर अत्याचार केला. क्रूरतेची सीमा ओलांडून त्याने पीडितेला “जर कोणाला काही सांगितले, तर जिवंत सोडणार नाही,” अशी धमकी दिली आणि तिथून पसार झाला.
आरोपी निघून गेल्यावर प्रचंड दहशतीत असलेल्या पीडितेने हिंमत एकवटून घडलेला प्रकार आपल्या वहिनीला सांगितला. वहिनीने वेळ न गमावता पोलिसांकडे धाव घेतली. पोलीस उपायुक्त मिलिंद मोहिते यांनी तातडीने घटनास्थळी भेट देऊन तपासाची चक्रे फिरवली. सध्या आरोपीविरुद्ध भारतीय न्याय संहितेच्या (BNS) गंभीर कलमांखाली गुन्हा दाखल करण्यात आला असून पोलीस त्याचा शोध घेत आहेत.
