लोणी काळभोर : पोलिसांच्या वारंवार प्रतिबंधात्मक कारवाईला न जुमानता बेकायदेशीर हातभट्टी दारू विक्रीचा व्यवसाय सुरूच ठेवणाऱ्या सराईत व्यावसायिकाला लोणी काळभोर पोलिसांनी अखेर दणका दिला आहे. त्याच्यावर महाराष्ट्र झोपडपट्टी गुंड, हातभट्टीवाले, औषधद्रव्य विषयक गुन्हेगार व धोकादायक व्यक्ती यांच्या विघातक कृत्यांना आळा घालण्याबाबतच्या (एमपीडीए) कायद्यान्वये कारवाई करण्यात आली आहे. त्याला एक वर्षासाठी स्थानबद्ध करण्याचे आदेश पोलीस आयुक्त अमितेश कुमार यांनी दिले असून, त्याची ठाणे मध्यवर्ती कारागृहात रवानगी करण्यात आली आहे. अशी माहिती लोणी काळभोर पोलीस ठाण्याचे वरिष्ठ पोलीस निरीक्षक समाधान पवार यांनी दिली आहे.

सुरेश रुपा बिरे (वय 60, रा. नांदेपाटील वस्ती, आर्या हॉटेलमागे, रामदरा रोड, लोणी काळभोर) असे स्थानबद्ध करण्यात आलेल्या दारू व्यवसायिकाचे नाव आहे. पोलिसांनी दिलेल्या माहितीनुसार, पुणे शहरातील कायदा व सुव्यवस्था अबाधित राखण्यासाठी तसेच नागरिकांच्या सुरक्षिततेच्या दृष्टीने सराईत गुन्हेगार, अवैध हातभट्टी दारू विक्रेते, अंमली पदार्थ विक्रेते आणि समाजात दहशत निर्माण करणाऱ्या गुन्हेगारांविरुद्ध कठोर कारवाई करण्याचे आदेश पोलीस आयुक्त अमितेश कुमार यांनी दिले आहेत. त्यानुसार, लोणी काळभोर पोलीस ठाण्याच्या हद्दीतील सुरेश बिरे हा वारंवार प्रतिबंधात्मक कारवाई करूनही बेकायदेशीर हातभट्टी दारू विक्रीचा व्यवसाय सुरू ठेवत होता. त्याच्या या कृत्यांमुळे परिसरातील नागरिकांचे आर्थिक व शारीरिक नुकसान होत होते. तसेच अनेक कुटुंबांचे संसार उद्ध्वस्त होत असल्याने नागरिकांमध्ये असुरक्षिततेची भावना निर्माण झाली होती.
या पार्श्वभूमीवर लोणी काळभोर पोलीस ठाण्याचे तत्कालीन वरिष्ठ पोलीस निरीक्षक प्रदीप पवार यांनी सुरेश बिरे याच्याविरुद्ध एमपीडीए कायद्यान्वये स्थानबद्धतेचा प्रस्ताव तयार करून पोलीस आयुक्तांकडे पाठविला होता. या प्रस्तावाला मंजुरी देत पोलीस आयुक्तांनी त्याला एक वर्षासाठी ठाणे मध्यवर्ती कारागृहात स्थानबद्ध करण्याचे आदेश दिले.

दरम्यान, स्थानबद्धतेचे आदेश जारी झाल्यानंतर सुरेश बिरे हा पोलिसांना मिळून येत नव्हता. त्यामुळे सध्याचे वरिष्ठ पोलीस निरीक्षक समाधान पवार यांच्या मार्गदर्शनाखाली विशेष शोध पथक नियुक्त करण्यात आले. या पथकाने शोध घेऊन त्याला ताब्यात घेतले असून, आदेशानुसार त्याची कारागृहात रवानगी करण्यात आली आहे.
सदरची कारवाई पुणे शहर पोलीस उपआयुक्त डॉ. जीवन बेनीवाल, लोणी काळभोरच्या सहायक पोलीस आयुक्त अनुराधा उदमले यांच्या मार्गदर्शनाखाली लोणी काळभोर पोलीस ठाण्याचे वरिष्ठ पोलीस निरीक्षक समाधान पवार वरिष्ठ पोलीस निरीक्षक, पोलीस निरीक्षक (गुन्हे) नंदकुमार कोळी, सहाय्यक पोलीस निरीक्षक सतीश गोडसे, पोलीस हवालदार विलास शिंदे, स्वाती पिसाळ पोलीस अंमलदार प्रशांत नरसाळे, पोलीस अंमलदार योगेश लवांडे यांच्या पथकाने केली आहे.






