मुंबई : महानगरपालिकेने शहरातील वाढत्या वायू प्रदूषणावर नियंत्रण मिळवण्यासाठी कडक पावले उचलली आहेत. हिवाळ्याची चाहूल लागताच वातावरणात गारवा वाढू लागला असून, हवेची गुणवत्ता खालावण्याची भीती व्यक्त केली जात आहे. या पार्श्वभूमीवर, महापालिकेने संपूर्ण मुंबईत एकूण 74 विशेष पथकांची नियुक्ती केली आहे. शहर भाग, पूर्व उपनगर आणि पश्चिम उपनगर अशा सर्वच भागांत ही पथके बारीक लक्ष ठेवून असणार आहेत.

थंडीपासून बचाव करण्यासाठी अनेक जण सार्वजनिक ठिकाणी शेकोटी पेटवतात, तर काही ठिकाणी कचरा जाळण्याचे प्रकार घडतात. या धुरामुळे हवेतील प्रदूषणाची पातळी झपाट्याने वाढते. ही समस्या रोखण्यासाठी प्रशासनाने दंडाच्या रकमेत मोठी वाढ केली आहे. यापूर्वी उघड्यावर कचरा जाळणे किंवा शेकोटी पेटवण्यासारख्या कृत्यांसाठी 500 रुपये दंड आकारला जात होता. मात्र, आता हा दंड थेट 2,000 रुपयांपर्यंत वाढवण्यात आला आहे. त्यामुळे नागरिकांना उघड्यावर आग लावणे आता चांगलेच महागात पडणार आहे.
वायू प्रदूषण कमी करण्यासाठी प्रशासनाने केवळ नागरिकांवरच नाही, तर व्यावसायिकांवरही निर्बंध घातले आहेत. बांधकाम व्यावसायिक, विविध कंपन्या, दुकानदार आणि सर्वसामान्य रहिवासी यांच्यासाठी महापालिकेने 28 नियमांची नियमावली जारी केली आहे. या सर्व नियमांची काटेकोरपणे अंमलबजावणी होत आहे की नाही, याची पाहणी नेमलेली पथके करतील.

नियमांचे उल्लंघन करणाऱ्यांविरोधात अत्यंत कठोर कारवाई करण्याचे संकेत पालिकेने दिले आहेत. यामध्ये संबंधितांना नोटीस बजावणे, सुरू असलेले काम तात्काळ थांबवणे आणि जागेवरच आर्थिक दंड वसूल करणे अशा कारवाईचा समावेश आहे. मुंबईची हवा स्वच्छ आणि निरोगी राहण्यासाठी सर्व नागरिकांनी तसेच बांधकाम क्षेत्रातील व्यावसायिकांनी प्रशासनाला सहकार्य करावे आणि घालून दिलेल्या नियमांचे पालन करावे, असे आवाहन करण्यात आले आहे.





