ICC Test Rankings : टीम इंडिया सद्या बॉर्डर गावसकर ट्रॉफी 2024-25 साठी ऑस्ट्रेलिया दौऱ्यावर असून या दौऱ्यातील कसोटी मालिकेत उभयसंघात एकूण 5 सामने खेळवण्यात येणार आहेत. ही मालिका 1-1 ने बरोबरीत आहे. टीम इंडियाने या मालिकेत विजयी सलामी दिली होती. मात्र ऑस्ट्रेलियाने दुसऱ्या सामन्यात जोरदार कमबॅक करत मालिकेत बरोबरी साधली. अपवाद वगळता टीम इंडियाचे खेळाडू या दुसऱ्या सामन्यात सपशेल अपयशी ठरल्याचे दिसून आले आहे. त्याचाच फटका या खेळाडूंना बसला आहे. या सामन्यात अपयशी ठरलेल्या खेळाडूंवर आयसीसीने मोठी कारवाई केली आहे. आयसीसीने ताजी कसोटी क्रमवारी जारी केली आहे. यामध्ये मोठी उलटफेर झाली आहे.
आयसीसी कसोटी क्रमवारीत इंग्लंडचा फलंदाज हॅरी ब्रूक याने सहकारी जो रुट याला मागे टाकत पहिल्या स्थानी मजल मारली आहे. तर रुटची दुसऱ्या स्थानी घसरण झाली. दोघांमध्ये फक्त 1-1 रेटिंग पॉइंट इतका फरक आहे. ब्रूकच्या खात्यात 898 तर रुटच्या नावावर 897 रेटिंग पॉइंट्स जमा आहेत. तर विराट कोहलीची 6 आणि रोहित शर्माची 5 स्थानांनी घसरण झाली आहे. विराटची 14 वरुन थेट 20 व्या स्थानी घसरला आहे. तर रोहित 26 वरुन 31 व्या स्थानी फेकला गेला आहे. तसेच ऋषभ पंत सहाव्या क्रमांकावरुन नवव्या स्थानी घसरला आहे.
टीम इंडियाच्या फलंदाजांना दुसऱ्या सामन्यात लौकीकाला साजेशी कामगिरी करता आली नव्हती. त्याचाच फटका या तिघांना आयसीसी क्रमवारीत बसला आहे. रोहितने कमबॅकनंतर घोर निराशा केली आहे, तर विराट आणि पंत या दोघांनाही मोठी खेळी करण्यात अपयश आले आहे.
फायदा कुणाला?
यशस्वी जयस्वाल याने मात्र त्याचं चौथं स्थान कायम राखलं आहे. टीम इंडियाविरुद्ध शतक करणाऱ्या ट्रेव्हिस हेडने 6 स्थानांची झेप घेतली आहे. हेड 11 वरुन 5 व्या स्थानी पोहचला आहे. हेडच्या खात्यात सद्या 781 रेटिंग पॉइंट्स आहेत.
बुमराहने कायम राखला नंबर 1..
दरम्यान टीम इंडियाचा वेगवान गोलंदाज जसप्रीत बुमराहने त्याचा पहिला क्रमांक कायम राखला आहे. बुमराह 890 रेटिंगसह पहिल्या स्थानी कायम आहे. आर अश्विनची चौथ्यावरुन पाचव्या स्थानी घसरण झाली आहे, तर रवींद्र जडेजा सहाव्या स्थानी कायम आहे.
