न्हावरे : पुणे जिल्ह्यातील घोडगंगा कारखान्यानजीक न्हावरे – चौफुला रस्त्यावर मोटारसायकल खांबाच्या लोखंडी तान्याला धडकून अपघात झाला आहे. या अपघातात एका व्यक्तीचा मृत्यू झाल्याची घटना घडली आहे. या अपघातात जळबा अशोक सावते (वय-३२, मुळगाव देवसरी, ता. उमरखेड, जि. यवतमाळ, सध्या रा. कारेगाव, ता. शिरूर) यांचा मृत्यू झाला आहे. याप्रकरणी भरत शशिराव काकडे यांनी शिरूर पोलिस ठाण्यात फिर्याद दाखल केली आहे.
याबाबत सविस्तर माहिती अशी की, किशोर सखाराम खडसे व त्यांचा मित्र मयत जळबा अशोक सावते हे दुचाकीवरून फलटण येथे देवदर्शनासाठी निघाले होते. दरम्यान, न्हावरे चौफुला रस्त्यावर घोडगंगा कारखान्यानजीक रस्त्याला खेटून असलेल्या विजेच्या खांबाच्या लोखंडी तान्याला दुचाकी धडकली. या अपघातात दुचाकीच्या पाठीमागच्या सीटवर बसलेले जळबा सावते रस्त्यावर उडून पडले. त्यात जळबा सावते गंभीर जखमी झाल्याने त्यांचा मृत्यू झाला. या घटनेचा पुढील तपास पोलिस हवालदार धनंजय थेऊरकर करत आहेत.
