विशाल कदम
लोणी काळभोर : महात्मा ज्योतीराव फुले शेतकरी कर्जमुक्ती योजनेअंतर्गत पीककर्जाची नियमित परतफेड करणाऱ्या शेतकऱ्यांना ५० हजार रुपये सरसकट प्रोत्साहनात्मक अनुदान देण्याचे सरकारने जाहीर केले होते. दिवाळीपूर्वी लोणी काळभोर परिसरातील ३९ शेतकऱ्यांना पहिल्या टप्प्यात प्रोत्साहनपर अनुदान मिळाले असल्याची माहिती पुणे जिल्हा मध्यवर्ती बँकेचे शेती विकास अधिकारी नंदकुमार भंडारी यांनी दिली.
राज्य शासनाने नियमित कर्ज परतफेड करणाऱ्या शेतकऱ्यांना प्रोत्साहनपर लाभ देण्यासाठी ५० हजार रुपयांचे अनुदान जाहीर केले होते. परतफेड करणाऱ्या शेतकऱ्यांना प्रोत्साहनपर लाभ देण्यासाठी २०१७-२०१८, २०१८-२०१९ आणि २०१९-२०२० हा कालावधी विचारात घेऊन, या तीन आर्थिक वर्षांपैकी कोणत्याही दोन आर्थिक वर्षात पीक कर्जाची उचल करुन नियमित पूर्ण परतफेड करणाऱ्या शेतकऱ्यांना ५० हजार रुपयांचे अनुदान मुख्यमंत्री एकनाथ शिंदे यांनी घोषित केले होते.
दरम्यान, ज्या शेतकऱ्याने ५० हजार, १ लाख किंवा त्यापेक्षा जास्त कर्ज घेतले असून गेल्या तीन वर्षांत त्याने पीक कर्ज ठरवून दिलेल्या कालावधीत भरले आहे. त्या शेतकऱ्याला ५० हजार रुपये दिले जाते. ज्या शेतकऱ्यांचे पन्नास हजारांपेक्षा कमी कर्ज आहे त्यांना कर्जाऐवढी रक्कम दिली जाणार आहे.
समजा, एका शेतकऱ्याने २० हजार कर्ज घेतले असेल तर त्याला २० हजार मिळतील. व ज्या शेतकऱ्याने १ लाख रुपये कर्ज घेतले असले तर त्याला ५० हजार रुपये मिळणार होते.
शासनाच्या निकषात बसणाऱ्या शेतकऱ्यांनी अनुदान मिळण्यासाठी अर्ज भरले होते. लोणी काळभोर, कदमवाकवस्ती, कुंजीरवाडी, आळंदी म्हातोबाची या परिसरातील १० संस्थांमधून तब्बल ३४५ शेतकऱ्यांनी या योजनेचा लाभ घेण्यासाठी अर्ज भरले होते. त्यातील ३९ शेतकऱ्यांना पहिल्या टप्प्यात मिळाले आहे. तर उर्वरित ३०६ शेतकऱ्यांना टप्प्याटप्प्याने अनुदान मिळणार आहे.
काही शेतकऱ्यांचे अनुदानाचे अर्ज चुकले आहे. त्यांनी भरलेल्या अर्जांची दुरुस्ती करावी जेणेकरून ते या अनुदानासाठी पात्र ठरू शकतील, अशी माहिती नंदकुमार भंडारी यांनी दिली.
