दौंड : दौंड शहरातील भीमा नदीकाठावरील ईदगाह मैदानाशेजारील काटवनात सुरू असलेल्या कथित गोहत्येच्या प्रकारावर पोलिसांनी छापा टाकत मोठी कारवाई केली. या कारवाईत तब्बल 300 किलो गोमांस जप्त करण्यात आले, तर कत्तलीसाठी आणलेल्या दोन खोंडांसह एका कालवडीची सुटका करण्यात आली. पोलिसांची चाहूल लागताच घटनास्थळावरून तिघांनी पळ काढला असून, त्यांच्याविरुद्ध दौंड पोलीस ठाण्यात गुन्हा दाखल करण्यात आला आहे.
याप्रकरणी पोलीस अंमलदार अमोल शहाणे यांच्या फिर्यादीनुसार आसिफ कासम कुरेशी, कय्यूम कुरेशी (दोघे रा. खाटीक गल्ली, दौंड) आणि दीपक जॉर्ज पिल्ले (रा. बेथल कॉलनी, दौंड) यांच्याविरुद्ध गुन्हा दाखल करण्यात आला आहे.
पोलिसांनी दिलेल्या माहितीनुसार, गुरुवारी (ता.01) सायंकाळी ईदगाह मैदानाशेजारील काटवनात गोहत्या सुरू असल्याची माहिती गोरक्षकांनी पोलिसांना दिली. या माहितीची खातरजमा करण्यासाठी पोलिसांचे पथक तातडीने घटनास्थळी दाखल झाले. मात्र, पोलिस आल्याची चाहूल लागताच तेथील तिघे संशयित पसार झाले. पोलिसांनी घटनास्थळाची पाहणी केली असता, तेथे सुमारे 300 किलो गोमांस आढळून आले. पोलिसांनी ते जप्त करून कत्तलीसाठी आणलेल्या तीन गुरांची सुटका केली.
दरम्यान, पशुवैद्यकीय अधिकाऱ्यांच्या उपस्थितीत जप्त केलेल्या गोमांसाचे नमुने तपासणीसाठी घेण्यात आले. त्यानंतर उर्वरित गोमांस पोलिसांच्या उपस्थितीत नष्ट करण्यात आले.
आधीही गोहत्येचे गुन्हे दाखल
या प्रकरणातील संशयित आसिफ कुरेशी आणि कय्यूम कुरेशी यांच्याविरुद्ध यापूर्वीही गोहत्या, गोमांसाचा साठा, वाहतूक आणिविक्रीप्रकरणी दौंड पोलीस ठाण्यात गुन्हे दाखल असल्याची माहिती पोलिसांनी दिली. फरार संशयितांचा शोध घेण्याचे आव्हान पोलिसांसमोर आहे.
