पुणे : नाशिकचे माजी महापौर अशोक मुर्तडक यांच्या कुटुंबाला तब्बल 200 तोळे (सुमारे 2 किलो) सोन्याचा गंडा घातला असल्याची माहिती समोर आली आहे. जुने दागिने दुप्पट करून देण्याचे आमिष दाखवून ही कोट्यवधी रुपयांची फसवणूक करण्यात आली असून, याप्रकरणी सरांफाविरुद्ध पंचवटी पोलीस ठाण्यात गुन्हा दाखल झाला आहे.
संशयित सराफ व्यावसायिक योगेश बाळकृष्ण दाभाडे याने गेल्या 2 वर्षांत मुर्तडक कुटुंबाशी जवळीक निर्माण केली होती. कुटुंबाचा विश्वास संपादन केल्यानंतर त्याने घरातील महिलांना एका फायदेशीर योजनेचे आमिष दाखवले. जुन्या सोन्याच्या बदल्यात दुप्पट सोने देण्याचे आमिष त्याने दाखवले. या भूलथापांना बळी पडत महिलांनी घरातील दागिने त्याच्याकडे सुपूर्द केले. यामध्ये अशोक मुर्तडक यांच्या पत्नीचे 100 तोळे, मुलीचे 50 तोळे आणि सुनेचे 50 तोळे असे एकूण 200 तोळे दागिने संशयिताने हस्तगत केले.
दागिने ताब्यात घेतल्यानंतर संशयित सराफाने अनेक महिने कोणताही परतावा दिला नाही. त्याचा संशयास्पद व्यवहार पाहून महिलांनी अखेर हा प्रकार अशोक मुर्तडक यांच्या निदर्शनास आणून दिला. मुर्तडक यांनी सराफाकडे सोन्याची मागणी केली असता, त्याने तब्बल 1.5 वर्षे विविध कारणे सांगून वेळकाढूपणा केला.
आपली फसवणूक झाल्याचे स्पष्ट झाल्यावर माजी महापौरांनी थेट पोलीस ठाणे गाठले. सध्या पंचवटी पोलिसांनी या हायप्रोफाइल आर्थिक फसवणुकीप्रकरणी गुन्हा नोंदवला असून, पोलीस या प्रकरणाचा अधिक तपास करत आहेत. या घटनेमुळे नाशिकच्या राजकीय आणि व्यावसायिक वर्तुळात खळबळ उडाली आहे.
